Lơ̆m cham să jê̆ 11 ha, hnam trưng Hoàng Việt  đei hơmet tôm tơmam drăm lăm hŏk ‘nao, hloh 400 kang ƀô̆, bơngai pơtho păng bơngai jang tơ̆ hnam trưng tŏk bŏk oei pơtho păng vei lăng pơhlom 3.400 hŏk tro đơ̆ng jăl kơđeh truh trung hŏk phôh thŏng truh đơ̆ng hloh 20 dêh char, pơlei tơm lơ̆m jơ̆p teh đak. Pơma ah jơ pơm jang, Phŏ thủ tướng bơnê kơ tơdrong tơchơ̆t jang đơ̆ng dêh char Đak Lăk lơ̆m tơdrong pơm kiơ̆ tơchơ̆t đơ̆ng Đảng, teh đak gah asong ăn pơtho pơhrăm, hơpơi ‘meh dêh char, anih jang pơtho pơhrăm adoi nhen bơngai pơtho păng đe hŏk tro tơ̆ hnam trưng Hoàng Việt pơtoi chĕp vei dôm tơdrong jang đei jơnei, hơnơ̆ng hơtŏk tơdrong pơtho pơhrăm ăn đe hŏk tro.

Ƀơ̆t ‘măng âu, Phŏ Thủ tướng teh đak bơ̆n Nguyễn Hòa Bình hlôi pơjao tơmam hơpah păng ƀanh trung thu ăn hŏk tro tơ̆ hnam trưng Hoàng Việt. Hơdrol kơ noh ah kơmăng năr 14/9, Phŏ thủ tướng Nguyễn Hòa Bình hlôi năm akŏm Trung thu “Hơdrŭng unh tơ̆k hơdah tơdrong hơpơi ‘meh” tơ̆ Đak Lăk, asong 1.700 tơpu tơmam đei jên hŏk, gre jrot păng tơmam trung thu ăn đe hơ-ioh đei tơdrong hơrih tơnap tap.