‘Măng hop akŏm vă hơlen, pơgơ̆r dôm tơdrong jang đơ̆ng rŏng kơ hop akŏm mă 13 păng pơđăp dôm trong jang, pơtoi pơklaih tơnap tap, tơhlăk tơhlĭn, hơtŏk tơdrong jang ming man kiơ̆ pơkăp. Pơma ah pơtơm hop akŏm, Thủ tướng Phạm Minh Chính ră hơdah, truh dang ei, tơdrong tơlĕch ming man mă Jơnŭm pơgơ̆r hơlen đei 40 tơdrong jang kăp gĭt lơ̆m kơsô̆ 92 tơdrong jang gah 3 tơdrong kăl jang: Trong nơnăm tơ̆ teh, trong gre treng păng trong gre păr, găn ga 48 dêh char, pơlei tơm mă Trung ương vei lăng.

Thủ tướng ră hơdah đơ̆ng dang ei truh hơtuch sơnăm 2025, oei pă pơhlom 15 khei dơ̆ng, tơdrong jang oei lơ. Kơyuơ noh, Thủ tướng athei akŏm pơma đam chă trong hơtŏk tenh tơdrong ming man, vei sơđơ̆ng dôm tơdrong tơlĕch jang; iŏk yua dôm tơdrong hlôh vao kăp gĭt đơ̆ng tơdrong dui tơlei unh hơyuh 500 kV jăl  3.