Lơ̆m 6 khei blŭng sơnăm ou, Hnam pơgang apŭng Di Linh, dêh char Lâm Đồng hlôi sơng ming hơmet ăn 250 ‘nu hơ ioh jĭ rơka, lơ̆m ou đei hloh mĭnh poăt măt bơngai hơ ioh ou kơ yuơ đơ̆ng gre tơtơ̆m. Ƀak si Lê Công Tuấn, Kơ iĕng Kơdră chĕp pơgơ̆r Hnam pơgang apŭng tơbăt, gơnơm iung jang hơdoi kơjăp đơ̆ng rim hơnih jang, tơdrong sar  bar pơm ăn jĭ rơka, măkăl hlơ̆k kơ đak hlôi tơjur kơtang. “Lơ̆m sơnăm 2024 ou, tơdrong chă jĭ rơka tơ̆ đe hơ ioh lơm apŭng Di Linh hlôi tơjur pơtêng hăm dôm sơnăm hơdrol, sar bar trong gre nơnăm tơmơ̆t 50%. Gơnơm tơdrong vang iung jang hơdoi hăm hnam trương, pơtho khan ăn đe hơ ioh ‘nĕ gan hao gre bơbit, kon pơlei đei rơvơn vei lăng năng tông kôn mon kon hơ ‘lơ̆p kơtang hloh kơna tơdrong chă glơ̆k kơ đak, sar ƀar trong nơnăm hlôi dă ƀiơ̆ pơtêng hăm dôm sơnăm hơdrol.”

Hăm groi teh đei lơ thoong đak kroong, hơboong đak, dơnou đak păng pơnơ̆t đak, vă tang găn tơdrong glơ̆k kơ đak, rim hơnih jang, khul jang tơ̆ apŭng Di Linh hlôi tơlĕch iung jang hơtơ̆p kơ hrĕng kơƀang tơbăt tơdrong hơmơt tơt tơ̆ rim dơnou đak; tơdruh tơmam đông tơgŭm dŏng, ‘long tơlei, rơkĭ… tơ̆ rim dơnou đak. Pơrô̆ tơbăt ăn kon pơlei kơchăng, var găn rim dơnou đak kơ ŭnh hnam. Kiơ̆ kơ yă Ninh Thị Một, Bơngai chĕp kơ̆l Koeng kơphô̆ 17, thĭ trân Di Linh, apŭng Di Linh, đơ̆ng rŏng pơrô̆ pơrôp, pơtho tơbăt ‘noh kon pơlei jei pơm kiơ̆ hloi trong tang găn glơ̆k kơ đak tơ̆ ŭnh hnam.“Lăp đơ̆ng rŏng pơrô̆ pơrôp, pơtho tơbăt ‘noh kon pơlei jei pơm kiơ̆ hloi chă chô̆ tơlei tơ̆ dơnou đak, vă tang găn hơlou tơdrong glơ̆k kơ đak kiơ̆ nơ̆r pơtho tơbăt đơ̆ng Hơnih chĕp pơgơ̆r tang găn glơ̆k kơ đak kơ thĭ trân”.

Mŏ Lưu Thị Thủy Chung, oei tơ̆ Koeng kơphô̆ 17, thĭ trân Di Linh, apŭng Di Linh, dêh char Lâm Đồng tơbăt, ŭnh hnam mŏ đei sir minh tŏ dơnou đak tang găn phang pơđang jrŭ dang 10 met kơtă lơ̆m pơgar hnam vă tơgŭm ăn chă tơruih. Vă sơđơ̆ng, mŏ hlôi var tăp dăr, pơm ‘măng khoă pơ ‘lơ̆ng vă hoei kơ đe mơ̆t, vă veh ver đei tơdrong ou to. “Dơnou ou tơgŭm ăn chă tơruih ‘long pơtăm, kơna rim đe duch nă păh khul dro kăn năm pơtho ăn iŏk tơlei chô̆ lôp gre vă mưh bơngai bu bơ̆h ƀơm chă huŏng lơ̆m dơnou ‘noh rôp tơlei ‘noh đei bơngai truh tơgŭm dŏng. Găh tăp dăr dơnou ‘noh var pơgar  păng pơm ‘măng vă dă ƀiơ̆ hơmơt. Dang yơ ŭnh hnam vă chă tơruih ‘noh plôih ‘măng mơ̆t”.

Tơdrong pơtho glơi păng pơtho tơbăt dôm tơdrong sơđơ̆ng tơ̆ đak ăn đe hơ ioh jei đei apŭng Di Linh tơlĕch jang. Lơ̆m khei ‘năr pơdơ̆h hŏk ou ki, hlôi đei mơjĭt lăm hŏk glơi ‘măn ăn đe hơ ioh đei pơih tơ̆ rim tơring, thĭ xah. Kiơ̆ đơ̆ng yă Hà Thị Thùy Linh, Kơdră chĕp pơgơ̆r Khul drŏ kăn  apŭng Di Linh, dêh char Lâm Đồng, jĭ bơngai lơ̆m khul chĕp pơgơ̆r, khul drŏ kăn rim hơnih ‘noh jing dôm bơngai tơm dơnơm vang iung jang pơrô̆ pơrôp pơtho tơbăt trong jang tang găn rơka, glơ̆k kơ đak tơ̆ đe hơ ioh.“Iung jang hơdoi hăm rim hơnih jang, khul jang tơ̆ tơring vang iung jang rim tơdrong bơ̆ jang pơrô̆ pơrôp, pơtho tơbăt tơ̆ tơring, vă pơih rim lăm hŏk pơtho glơi ăn kôn mon kon sou rim pơmai oh lơ̆m khul drŏ kăn apŭng. Đơ̆ng noh pơm hơtŏk tơdrong hlôh vao ăn pơmai oh păng đe hơ ioh, tơgop ăn tơdrong hơrih sa sơđơ̆ng ‘lơ̆ng hơ iă. Pơjing rơvơn ăn hơ ioh tih vơ̆ djơ̆ ‘lơ̆ng hloh dơ̆ng”.

Rim lăm pơtho glơi đei pơih tơgŭm ăn rim đe oh băt hlôh găh đak adoi nhen pơhrăm jơhngơ̆m pran jăng grăng akou păng pơgơ̆r chơt hơ iă ‘nă hal, ‘lơ̆ng liem lơ̆m khei năr pơdơ̆h kơ hŏk. Oh Nguyễn Thiên Di, 13 sơnăm tơring Liên Đầm, apŭng Di Linh, dêh char Lâm Đồng, pơma: “Ĭnh hŏk glơi đĭ 2 giĕng bơih, đei đei rim ƀok thây kô pơtho glơi. Lơ̆m khei pơdơ̆h hŏk ĭnh hŏk glơi vă veh ver tơdrong glơk kơ đak păng pơhrăm ăn jơhngơ̆m jăn pran jăng grăng akou ăn kơ dih”.

Oh Trịnh Ngọc Bảo Châu, 12 sơnăm, jei oei tơ̆ tơring Liên Đầm tơbăt: “Ba hŏk pơhrăm glơi ‘noh vă mư̆h chă tơsĕr huŏng lơ̆m dơnou đak, đak kroong, thoong hơboong đak dăh mă tơ̆ dôm dơnou jrŭ ‘noh ba gơ̆h glơi năm tơ̆ jih”.

Hăm tơdrong iung vang jang đơ̆ng khul kơdră tơring păng rim khul jang, tơdrong sar bar rơka tơ̆ đe hơ ioh tơ̆ apŭng Di Linh hlôi tơplih kơtang, pơjing rơvơn ăn rim đe oh đei pơchơt pơhiơ̆ ‘lơ̆ng hơ iă, pơjing đei jơhngơ̆m pran jăng grăng akou, sơđơ̆ng.