Anih jang gah Trong nơnăm Pơdŭ tơmam drăm dêh char Đak Nông ăn tơbăt, kơyuơ ‘mi tih đunh năr, jăl trong Hồ Chí Minh tơ̆ Km1936+ 080 păng Km1936+300 găn thôn 3, xah Quảng Tín, apŭng Đak R’lấp ƀôh teh tơhlŭn hơđăng ah chơnĕng ta luy pĕng vă hơtŏk tơmăn teh man jăl trong. 2 anih hơđăng âu hơtaih băl hloh 200m, hli hlơt pơm ăn jăl ưh đei sơđơ̆ng mưh vih vơ̆t ah jăl mă âu.

Anih jang gah Trong nơnăm hlôi pơgơ̆r pơm jang hăm rim anih jang đei tơrĕk vă chă trong hơmet ming, tơjur tơdrong răm truh jăl trong, vei sơđơ̆ng jăl trong vih vơ̆t tơ̆ jăl trong Hồ Chí Minh găn tơring ‘nao roi tơ̆ kơpal. Jơnŭm pơgơ̆r tơring păng anih jang đei tơrĕk tơ̆ tơring hlôi hơvơn rim unh hnam oei tơ̆ tơring ƀơm răm dah ‘nhăk mŭk drăm kơdih lĕch đơ̆ng tơring tơhlŭn hơlih vă vei sơđơ̆ng ăn kơdih. Kiơ̆ tơdrong hơlen chiha kŏm mă blŭng, tơdrong tơhlŭn hơlih pơm ăn anih tĕch đak xăng đak dâu, anih tĕch kaphê păng teh tơter jih trong kơ 15 unh hnam ƀơm răm.