Tơ̆ hop akŏm, Thủ tướng Phạm Minh Chính ƀrơ̆k mơnat, pơtruh nơ̆r jet gia, nơ̆r sơ ‘ngon đơ̆ng Anih tơm Chinh trĭ, Ban Bí thư, Tổng Bí thư, Kơdră teh đak Tô Lâm păng kơdră chĕp kơ̆l Đảng, teh đak truh hăm dôm anih jang, tơring tơrang, khul grŭp, mă loi jĭ dôm unh hnam đei bơngai lôch răm, hiong hơkâu, jĭ rơka đơ̆ng ‘mi kial kơsô̆ 3.

Thủ tướng ăn tơbăt, hăm jơhngâm đon tơgŭm băl, hla ‘lơ̆ng bơ̆ng hla hiăh, Anih Trung ương Mặt trận tổ quốc Việt Nam pơm lêh tơlĕch trong tơgŭm ăn kon pơlei hiong răm đơ̆ng ‘mi kial kơsô̆ 3, akŏm đĭ đăng kơsô̆ jên tơgŭm truh dang ei hlŏh 1.000 ti. Khul kơdră teh đak hlôi tơgŭm ăn dôm tơring hlŏh 350 ti, 300 tân phe… păng oei chih jô̆ hơlen vă đei trong tơgŭm dơ̆ng.

Thủ tướng pơma hơdăh, bơ̆n athei bơ̆ jang mă pran hlŏh dơ̆ng dôm tơdrong jang hơmet pơ ‘lơ̆ng hiong răm đơ̆ng ‘mi kial kơsô̆ 3 yoa jơhngâm đon ‘mêm kơ hơdrĕch hơdrung, ‘mêm kơ kon pơlei, yoa tơdrong arih xa kơ kon pơlei hăm đon pơhnŏng: Ưh đei lê̆ kon pơlei yơ ưh đei por sŏng đak nhă, ưh đei hơbăn ao hrŭk, pơngot rơvĕt, tơngiĕt găng, ưh đei anih oei, ưh đei dôm tơmam yoa kăl lơ̆m rim năr.