Tŏk bŏk oei chă răt ƀanh tơ̆ hơnih tĕch ƀanh trung thu tơ̆ trong Lê Thánh Tông, pơlei tơm Buôn Ma Thuột, pơmai Phùng Thị Thúy Hạnh, phương Tân An, pơlei tơm Buôn Ma Thuột tơroi, kon hơ-ioh pơmai lăp xa ƀanh trung thu.

Sơnăm âu, ƀanh đei lơ hơnăn păng um rŭp hloi, mă lei unh hnam pơmai oei lăp dôm kơluăi ƀanh juăt jue đĕch, đei hơnăn juăt chă tĕch răt: “Ah mă rơih răt ƀanh trŭng thu noh inh rơih dôm kơluăi ƀanh ‘lơ̆ng, đei anih tĕch juăt tơpăt lơ̆m tơring vă kơ sơđơ̆ng păng um ai ‘lơ̆ng hloh”

Tĕch ƀanh trŭng thu đunh hloh 30 sơnăm kơ âu, pơmai Nguyễn Thị Tuyết Mai, tơ̆ phương Tân Lợi, pơlei tơm Buôn Ma Thuột ăn tơbăt, ƀanh trŭng thu hơnơ̆ng đei pơkăp tŏ sĕt năr yua, noh pơmai ưh đei akŏm tĕch minh ‘măng mă asong iŏk lơ ‘măng. Pơm thoi noh ƀanh ‘lơ̆ng păng ưh đei akŏm lơ: “Inh akŏm ƀanh tĕch ưh đei minh ‘măng ôh, mă inh asong kiơ̆ lơ ‘măng noh ƀanh layơ adoi ‘nao vă bơngai răt đe sơđơ̆ng jơhngơ̆m chă xa. Mă noh jing tơdrong kăl mă blŭng”

Tơ̆ siu thĭ Go Buôn Ma Thuột, anih tĕch ƀanh Trung thu đei siu thĭ ‘măn atŭm hăm anih tĕch plei ‘long vă ƀanh gơh vei lơ̆m anih hơyuh tŏ ‘lơ̆ng lăp. Ƀok Bùi Văn Quân, Kơdră Siu thĭ Go Buôn Ma Thuột ăn tơbăt: “Nhôn hơlen tơdrong ‘lơ̆ng đơ̆ng chă răt tơmơ̆t tơmam drăm păng anih ‘măn tĕch vă vei sơđơ̆ng hơngeo ƀanh ưh đei phŭng. Dang ei ƀanh đei ‘măn ah anih hăm hơyuh tŏ đơ̆ng 25 truh 27 đô̆ păng nhôn tĕch ƀanh trung thu ưh đei pơm hăm kơchơ̆t pơgang âu to ôh”

Vă vei lăng ‘lơ̆ng jơhngơ̆m jăn bơngai răt yua, tơdrong jang hơlen vei rơgoh tơmam drăm xa hơdrol, lơ̆m păng đơ̆ng rŏng kơ Têt Trung thu đei dêh char Đak Lăk jang tơnăp. Kiơ̆ kơ noh, Anih jang vei lăng kon pơlei dêh char hlôi akŏm 2 khul jang hơlen gah rơgoh sơđơ̆ng tơmam xa lơ̆m khei Têt Trung thu sơnăm 2024 tơ̆ pơlei tơm Buôn Ma Thuột, thĭ xah Buôn Hồ păng dôm apŭng Krông Pach, Ea Kar, Cư Kuin păng Lăk. Atŭm hăm noh, Anih jang Vei lăng tơring tĕch răt tơmam drăm dêh char Đak Lăk păng dôm apŭng, thĭ xah, pơlei tơm adoi akŏm dôm khul jang hơlen vă tơtom tang găn, sek tơlang dôm tơdrong pơm glăi gah pơmt ơlĕch, tĕch răt tơmam drăm ƀanh kĕo lơ̆m khei Têt Trung thu sơnăm âu.

Lơ̆m tơdrong chă hơlen, rim khul jang hlôi akŏm hơlen gah tơdrong hăm đei yua pơgang ‘mê̆ au to lơ̆m tơmam xa ưh, vă vei sơđơ̆ng rơgoh lơ̆m tơdrong pơm tơlĕch tơmam xa ‘lơ̆ng; hơlen tơm a la chă tơmam pơm ƀanh; hla bar hoă đơn, pơkăp kơjă... Ƀok Vương Minh Sơn, Phŏ Kơdră Anih jang vei lăng tơring tĕch răt tơmam drăm dêh char Đak Lăk ăn tơbăt, rim khul jang hơlen adoi tơlĕch chă tơroi tơbăt truh dôm anih pơm tơlĕch păng tĕch ƀanh trŏ nhen tơchơ̆t gah tĕch răt tơmam drăm păng vei rơgoh ‘lơ̆ng tơmam xa, tơdrong pơm kiơ̆ pơkăp gah tơbang tơchơ̆t tơmam drăm ‘lơ̆ng ƀlep kơlươ̆t pơkăp: “Nhôn pơgơ̆r rim anih jang akŏm lơ̆m hoă đơn hla bar chih tơbang tơm a la chă. Mă 2 noh hơnăn tơmam drăm, lơ̆m noh athei chih tôm hơnăn, mă kăl hloh noh chih pơkăp tơdrong ‘lơ̆ng, khei năr yua, khei năr vei lăng. Mưh ƀôh pơm glăi noh gô sek tơlang kiơ̆ trŏ nhen tơchơ̆t đơ̆ng khôi lươ̆t teh đak"

Kiơ̆ đơ̆ng chă hơlen, truh dang ei Khul jang vei lăng tơring tĕch răt tơmam drăm kơsô̆ 1 hlôi ƀôh đei 2 anih tĕch răt ƀanh lơ̆m pơlei tơm Buôn Ma Thuột chă tĕch ƀanh ưh kơ băt tơm a la chă noh: 42 kơluăi ƀanh trung thu (kơluăi  500 g minh pôm), 50 kg tăo brê hơna kro, hloh 2.300 tơmam pơsuh pơchơt đe hơ-ioh ưh kơ ‘lơ̆ng nhen (phao, săng, đao, hră, âu to), hăm kơjă hloh 33 trĭu hlj. Tôm tơmam roi tơ̆ kơpal noh răt glăi ưh đei hoă đơn, hla bar pơkăp trŏ ƀlep. Khul jang hlôi sek phak hrŭ jên hăm 2 anih tĕch pơdro âu păng athei soh lê̆ tôm tơmam drăm pơm glăi.