Lơ̆m kơ sô̆ âu, đei 3 ‘nu rơka ăl hlôi đei răih hơmet tơ̆ Hnam pơgang đa khoa Kon Tum, chơ vih tơ̆ pơlei tơm Hồ Chí Minh păng hơnơ̆ng đei ƀĭch tơ̆ hnam pơgang dŏng hơmet. Tơdrong chơ dôm bơngai răm đei pơm kiơ̆ ‘meh vă đơ̆ng ŭnh hnam păng kơdră chĕp kơ̆l Anih jang vei lăng mơdro sa pơlei tơm Hồ Chí Minh.
Hơdrol ‘noh, kơ sơ̆ 13/4, gre chơ tơmoi chơ khŭl năm tơmang lăng kơ Anih jang vei lăng mơdro sa pơlei tơm Hồ Chí Minh ‘noh đei 21 ‘nu ƀơ̆t năm tơ̆ trong gre 24 truh trong brih plei Đăk Puih, xăh Đăk Tờ Re, apŭng Kon Rẫy, dêh char Kon Tum ‘noh tơƀơ̆p gre preh băl.Tơdrong gre tơ̆m preh băl pơm ăn ƀok Nguyễn Thành Triệu lôch kơ tă hơnih păng 24 ‘nu, lơ̆m noh đei 20 ‘nu kơ khŭl năm tơmang lăng, 2 ‘nu huơ̆r gre tih păng gre chơ tơmoi, 1 ‘nu bơngai ŭnh hnam kơ bơngai huơ̆r gre păng 1 ‘nu bơngai chông ba tơmang lăng đei rơka.
Viết bình luận