Lơ̆m hop akŏm âu âu, Khul kơdră chĕp kơ̆l đảng dêh char Đắk Lắk roi tơbăt tơdrong tơchơ̆t pôk hơtŏk, tơplih tơdrong jang hăm lơ bơngai, kăn ƀô̆ găh Anih jang Tư Phap, Anih vei lăng jên hu dêh char, Anih vei lăng choh jang xa păng atŏk tơiung tơring tơrang dêh char, Anih pơvih ăn Anih vei lăng kon pơlei dêh char, Anih jang đoàn dêh char, Anih vei lăng hơdrĕch kon kông, Khul kơdră chĕp kơ̆l đảng dôm apŭng Ea Kar, Ea Súp, Krông Ana, Buôn Đôn păng Ea Hleo.

Pơma ƀât pơjao tơdrong jang, ƀôk Nguyễn Đình Trung, Kơdră jang lơ̆m Trung ương Đảng, Bí thư đảng dêh char Đắk Lắk pơma hơdăh, lơ̆m tơdrong jang kăn ƀô̆, tơdrong pơtruh, tơplih kăn ƀô̆ năm bơ̆ jang ‘nŏh jĭ tơdrong đei hơnơ̆ng păng tôch gĭt kăl vă pơtho pơhrăm kăn ƀô̆ kiơ̆ đơ̆ng tơdrong jang tơ̆ yăn âu, pơm hơtŏk jơhngâm đon jang chinh trĭ, chĕp kơ̆l pơgơ̆r gơ̆h hơgei tôm tơdrong ăn khul kăn ƀô̆.