Đơ̆ng blŭng sơnăm truh dang ei, đei 37 anih jang mŭk drăm lơ̆m păng ‘nguaih kơ teh đak truh hơlen chă trong asong jang tơ̆ dêh char Đak Lăk. Anih jang vei lăng kon pơlei dêh char hlôi kĭ pơkăp asong ăn 7 tơdrong vă jang, hăm kơsô̆ jên chih măt hloh 2.600 tih hlj. Asong hla bar pơkăp iŏk jang ăn 1 tơdrong jang FDI đei jên chih măt 16,5 tih hlj. ‘Nâu jing kơsô̆ kơđeh hăm tơring đei sơkơ̆t pran gah mŭk drăm vă hơtŏk jang lơ tơdrong nhen Đak Lăk.

Tơdrong tơm hơvơn asong jang tơ̆ Đak Lăk ưh đei lơ noh kơyuơ tơhlăk tăk gah anih jang “rơgoh ‘lơ̆ng” hăm pơkăp tih vă sơng dôm anih jang mŭk drăm dah tơlĕch pơm jang hloi. Anih Asong jang Đak Lăk tŏk bŏk oei jang hadoi hăm dôm anih jang đei tơrĕk keh đang dôm tơdrong jang vă hơvơn anih asong jang pran vă pơtruh ăn Anih jang vei lăng kon pơlei dêh char dah hrôih pơtơ̆ng truh dôm anih jang mŭk drăm lơ̆m păng ‘nguaih kơ teh đak truh hăm tơring.