Ah cham pơhiơ̆ jơk ƀlik tơ̆ Kơđông linh vei sơlam teh Sê Rê Pốk, tơ̆ xah Krông Na, apŭng Buôn Đôn dêh char Đăk Lăk, um man Ƀok Hồ hăm khul linh vei sơlam teh noh grasia păng tơguăt. Đại úy Phạm Văn Thức, jang Chĭnh trĭ phŏ tơ̆ Kơđông linh vei sơlam teh Sê Rê Pốk ăn tơbăt, đơ̆ng rŏng 2 khei iŏk man, um man keh đang trŏ ah năr tơbăt 134 sơnăm năr rơneh Ƀok Kơdră Hồ Chí Minh roi jing kăp gĭt hloh: “Ah đei tơdrong tơlĕch jang gah joh ayŏ noh anih linh đei minh tơdrong jang kăp gĭt tih tên hloh, ưh hơdrô̆ gah tơdrong joh ayŏ mă oei pơtho pơhrăm juăt jue kăp gĭt ăn kơ lơ jơhnơr kan ƀô̆, khul linh tơ̆ Kơđông linh Sê Rê Pốk, minh tơdrong kăp gĭt sơkơ̆t tơdrong chĕp vei păng pơdjoi juăt jue nuih mơng kơ khul ƀô̆ đô̆i vei lăng sơlam teh”.

Đơ̆ng sơnăm 2019 truh dang ei, khul sơnăm mơlôh Đăk Lăk hlôi hơvơn lơ tơdrong jang, jang hadoi hăm dôm anih ming man 4 um man Ƀok Hồ hăm khul linh vei sơlam teh, đei ‘măn ah cham pơhiơ̆ tơ̆ kơđông linh vei sơlam teh lơ̆m dêh char. Tơ̆ hơla um man đei chrah 4 trong pơđơ̆k mă Ƀok Hồ pôk ăn đe kan ƀô̆ khul linh vei sơlam teh: “Teh đak noh tih să/ Vei lăng Teh đak bơ̆n ưh đei pơngơ̆t kơ tơnap/ Kông kơjung tơdrong jang roi kơdêh/ Dơsĭ jrŭ jơhngơ̆m bơ̆n roi jrŭ kơtang”.

Hram kơjăp nơ̆r Ƀok pơtho, lơ jăl kan ƀô̆ khul linh vei sơlam teh tơ̆ Đăk Lăk hơnơ̆ng hơdrin găn hloh tơnap tap vă keh đang tơnăp sơnong jang. Thượng úy Y Son Niê Êban, tơ̆ Kơđông linh vei sơlam teh Yok Đôn, xah Krông Na, apŭng Buôn Đôn tơroi: “Ƀok Hồ ‘noh bơngai tơ-iung pơjing khul Ƀô̆ đô̆i Vei sơlam teh, hơdrol kơ noh khul linh kon pơlei. Ƀok adoi kơtă truh apong tơ-iung pơjing Hŏk viê̆n Ƀiên phŏng. Tơdrong mă noh kăp gĭt tơpă, tơƀlŏk ăn kan ƀô̆, khul linh adoi nhen đoan viên hơnơ̆ng athei hŏk pơhrăm păng pơm kiơ̆ đon bơnôh, trong jang Hồ Chí Minh”.

Kiơ̆ kơ Đại úy Nguyễn Bá Giáp, Tơgŭm gah tơdrong jang chĭnh trĭ, Ƀô̆ đô̆i vei sơlam teh dêh char Đăk Lăk noh, um man Ƀok Hồ pơjao kơđôp teh ăn đe linh hơnơ̆ng hăm nơ̆r tơtă hăm đe linh vei sơlam teh athei tơgĭt rim hơgăt teh tơ̆ tơring sơlam teh đak: “ ‘Nâu adoi jing minh lơ̆m dôm tơdrong kăp gĭt adoi nhen tơdrong sơkơ̆t pơgơ̆r kơ teh đak hăm rim hơgăt teh păng tơbăt hăm jăl kan ƀô̆, khul linh vei sơlam teh keh đang tơnăp sơnong jang đei pơjao, chĕp kơjăp phao lơ̆m tơpang ti vă vei lăng kơjăp hơgăt teh grasia kơ Teh đak”.

Um man Ƀok Hồ hăm khul linh vei sơlam teh đei ‘măn tơ̆ dôm kơđông linh vei sơlam teh noh tơmam đei đơ̆ng tơdrong atŭm jơhngơ̆m đơ̆ng đe đoan viên hơdruh tơdăm lơ̆m dêh char Đăk Lăk. Pơmai H’Giang Niê, Ƀĭ thư Anih jang đoan dêh char Đăk Lăk ăn tơbăt, âu adoi jing tơdrong jang tơgop pơtho pơhrăm juăt jue ăn đe sơnăm mơlôh: “Nhôn man um man Ƀok Hô hăm khul linh vei sơlam teh noh vă đe boăl đoan viên, hơdruh tơdăm ah năm truh sơlam teh gô đei tơmơ̆ng tơroi gah tơring sơlam, tơroi gah đon bơnôh, trong jang Hồ Chí Minh, tơroi kơ linh vei sơlam teh păng noh jĭ tơdrong hơlêm tih tên hăm kan ƀô̆, khul linh ah đei um man tơ̆ ‘noh. Nhen Ƀok Hồ oei hơnơ̆ng hăm đe kan ƀô̆, khul linh tơ̆ tơring sơlam".

Um man  “Ƀok Hồ hăm khul linh vei sơlam teh” hlôi jing mŭk drăm kăp gĭt kơ khul linh, đei kơjă tih tên gah joh ayŏ, pơjing tơƀôh um rŭp Ƀok Hồ hăm khul linh vei sơlam teh, tơƀôh tơdrong tơrĕk tih tên đơ̆ng Đảng, Ƀok Hồ hăm tơdrong jang vei lăng kơdih tơdrong pơgơ̆r kơ teh đak, vei sơđơ̆ng tơpôl teh đak hăm đe kan ƀô̆, khul linh vei sơlam teh. Um man “Ƀok Hồ hăm khul linh vei sơlam teh” tơring sơlam teh Đăk Lăk hlôi jing mŭk drăm kăp gĭt gah đon bơnôh, tơgŭm ăn rim kan ƀô̆ linh hăt hot hŏk pơhrăm păng pơm kiơ̆ đon bơnôh, trong jang Hồ Chí Minh, chĕp vei tơdrong juăt jue đơ̆ng mih ma chơng trong hơlâu vă vei lăng, tơ-iung pơjing păng hơtŏk pơ-‘lơ̆ng pơlei pơla.