‘Năr tŏ hang, phang pơđang đunh pơm ăn tơdrong ‘mĕh yoa unh điên tơ̆ Đắk Lắk tŏk. Ƀât blŭng khei 4/2024, kơsô̆ unh điên đei pơtruh hlŏh 510MW, tŏk 27% pơting hăm khei âu sơnăm sơ̆. Gơnơm kơchăng hăm lơ tơdrong, anih jang unh điên Đắk Lắk bơ̆ jang sơđơ̆ng ‘lơ̆ng, pơtruh unh điên tôch sơđơ̆ng ăn tơmoi. Dôm tơdrong hơgăt lơ̆m tơdrong vei lăng ki thuơ̆t đei jang đang ‘lơ̆ng păng tŏk hlŏh nơ̆r hơgăt đei pơjao.

Đơ̆ng blŭng sơnăm truh dang ei, dôm anih jang unh điên lơ̆m dêh char hlôi hơlen năng, hơmet pơ ‘lơ̆ng 158 tơdrong hư, cham tơ̆ trong tơlei unh điên. Tơ̆ hop akŏm hơlen năng trong vei lăng ki thuơ̆t ‘nao âu, ƀok Trần Tấn Phùng – Phŏ Kơdră chĕp kơ̆l Công ty jang unh điên Đắk Lắk athei dôm anih jang hơnơ̆ng hơtŏk đon jang tơnăp, ‘moi kiơ̆ rim tơdrong tơ̆ yăn âu vă pơgơ̆r bơ̆ jang ‘lơ̆ng dôm tơdrong jang, vei lăng sơđơ̆ng ‘lơ̆ng unh điên ăn kon pơlei.