Tơring Tu Mrông, dêh char Quảng Ngãi, đei pơjing ‘moi kiơ̆ hơgrop 2 tơring Tu Mrông hăm Đak Ha, dêh char Kon Tu so. Dang ei tơring đei 17 pơlei, măt bơngai kon pơlei vă jê̆ 6.500 ‘nu. Đang ƀô̆ tơring đei 26 chi ƀô̆ hăm 300 ‘nu đang viên. Đơ̆ng rŏng khul kơdră chĕp pơgơ̆r tơring 2 kâp iung jang, khul kơdră chĕp pơgơ̆r Đảng tơring pơgơ̆r tơƀơ̆p muh măt kang ƀô̆, bơngai jang hăm 2 trong tơlĕch jang tơm ‘noh: “Sơđơ̆ng jơhngơ̆m đon, hơnih jang-Kiơ̆ yok rok jơ̆ng jơhngơ̆m đon tơgoăt tơgoăl pôm nơ̆r ƀơ̆r đon” păng “Hơtŏk kơtang iung jang ăn Kon pơlei-Atŏk kơtang hơmet pơ ‘lơ̆ng trong bơ̆ jang”.

Adoi, Khul kơdră chĕp pơgơ̆r tơring jei tĕnh koăng hơmet ăn tơdrong pơgơ̆r Hop akom tih jăl XVIII, jăl jang 2025-2030 vă pơjing hơyak pran kơtang lơ̆m atŏk tơ iung mŭk drăm-tơpôl. Ƀok Võ Trung Mạnh, Ƀĭ thư Đang tơring Tu Mrông, tơbăt:“Tơring ‘nao sơkơ̆t hơdăh atŏk tơ iung trong hnam, mơdro sa vă sơng hơvơn tơmoi truh năm tơmang lăng mir pơgar sâm Ngọc Linh, đơ̆ng nŏh pơgơ̆r rim kơchơ sâm. Tơring jei hlôi sơkơ̆t hơdăh rim hơnih vă tơ iung pơjing atŏk tơ iung tơmang pơhiơ̆ lơ̆m tơring, atŏk tơ iung tơmang pơhiơ̆ tơ̆ Đak Cum 1. Tơring jei sơkơ̆t hơdăh atŏk tơ iung ‘long pơgang ‘noh tơm hloh. ‘Ngoăih sâm Ngọc Linh gô vă lang să rim sâm anai vă chă pơtêng, đơ̆ng noh vei lăng năng tông hơnăn sâm Ngọc Linh lơ̆m tơring”.

Atŭm hăm bơ̆ jang ‘lơ̆ng khul kơdră tơring, rim tơring groi kông dêh char Quảng Ngãi tŏk bŏk tơƀôh hơdăh jơhngơ̆m đon iung jang kơtang, hơmet ăn ‘lơ̆ng ăn Hop akŏm tih Đang ƀô̆ jăl ‘nao 2025-2030, kiơ̆ ƀlep nơ̆r pơrô̆ jang đơ̆ng Tổng Bí thư Tô Lâm mưh đei ‘măng năm ngôi păng bơ̆ jang tơ̆ dêh char. ‘Noh jang kiơ̆ ‘lơ̆ng Nơ̆r athei jang kiơ̆ 45; Tơ iung pơjing hla bơar tơbăt bơ̆ jang chinh trĭ trŏ lăp hăm đơ̆ng rŏng hơgrop; tơƀôh hơdăh, sơkơ̆t hơdăh dôm hơyak tŏk kơtang, tơdrong jang tơm păng trong atŏk tơ iung hơdăh.

Ƀok Nguyễn Đức Tuy, Kơ iĕng Kơdră chĕp pơgơ̆r Đảng dêh char, Kơdră chĕp pơgơ̆r Jơnŭm vei lăng kon pơlei dêh char Quảng Ngãi, tơbăt:“Hla bơar chinh trĭ tơƀôh hơdăh trong tŏk kơtang, kơrŭn đĭ ai vă tơlĕch jang lơ̆m jăl jang truh. Tơdrong atŏk tơ iung tih tên kơna tơring dang ei kăl iung jang dôm tơdrong jang tih hloh. Băt hơdăh tơdrong ayơ đei tơdrong jang lơ liơ chih tơbăt hơdăh lơ̆m trong bơ̆ jang chinh trĭ vă iung jang ƀlep vă kĕ atŏk tơ iung păng pơm hơtŏk tơdrong hơrih sa sơđơ̆ng dơ̆ng kơjăp ăn kon pơlei, mă kăl ‘noh tơring kon kông”.

Hop akŏm tih Đang ƀô̆ rim tơring groi kông Kon Tum găh dêh char Quảng Ngãi gô jing jơ rơvơn vă rim tơring sơkơ̆t hơdăh dơ̆ng trong atŏk tơ iung, rơih ƀlep hơyak pran kơtang, iung jang kiơ̆ dôm tơdrong đei vă tơlĕch jang kiơ̆ keh đang trong tơlĕch jang atŏk tơ iung pran, kơjăp lơ̆m jăl ‘nao.