Đơ̆ng mă đei kang ƀô̆ đảng viên truh tơ̆ hnam chă pơrô̆ tơplih chehphe kră krŭt plei ưh kơ gan ăl chă pơtăm ‘nhot, pơkao păng pơmur, ŭnh hnam ƀok Liêng Hót Ha Linh, oei tơ̆ pơlei Đạ Tro, tơring Đạ Nhim, apŭng Lạc Dương (Lâm Đồng) mă pơ̆n jang kiơ̆ păng hơnhăk đei iŏk yua kơjăp ăn ŭnh hnam. Ƀok Liêng Hót Ha Linh tơbăt, 6 sao ‘nhot, pơkao păng pơmur, ŭnh hnam jang kiơ̆ choh jang sa kmăi kmŏk hơgei kơna tơdrong chă tĕch mơdro hlot lơ, jô̆ hơtŏ lơ̆m sơnăm ŭnh hnam jang sa iŏk đei hloh 500 triu hlak jên.“Gơnơm rim kang ƀô̆ đảng viên, khul kơdră tơring năm truh chă pơrô̆ athei tơplih ‘long pơtăm, adoi pơih lăm hŏk pơtho găh kih thuơ̆t choh jang sa, ŭnh hnam mă pơ̆n chă tơplih hơgăt teh chehphe ưh kơ jing ‘lơ̆ng vă pơtăm pơmur, pơkao lơ̆m hnam pơnil. Đơ̆ng mă noh, tơdrong jang sa kơ ŭnh hnam đei iŏk yua kơjăp, lơ hloh kơ sơ̆. Jei đơ̆ng noh, kơdih ba păng kon pơlei lơ̆m pơlei mă hlôh vao găh trong jang sa lơ lau mă đei iŏk yua kơjăp, hơnhăk mŭk drăm ŭnh hnam atŏk tơ iung”.

Kiơ̆ đơ̆ng đảng viên Cil Pam Ka Duyên, Chi bộ thôn Đạ Tro, vă kon pơlei lui kiơ̆ păng pơ̆n tơplih trong jang sa, tơplih ‘long pơtăm, hơnhăk ba dôm ‘long pơtăm ‘nao tơmơ̆t jang sa, pơm hơtŏk jang sa iŏk yua kơjăp ‘noh rim đảng viên lơ̆m chi ƀô̆ kăl jing dôm bơngai đảng viên pơm jŭk yŭk trong hơlau. Ăp pơm jŭk yŭk trong hơlau lơ loh, kơna tơdrong chă pơrô̆, tơbăt rim trong bơ̆ jang đơ̆ng Đảng păng Khôi luơ̆t teh đak mă hơnhăk đei jơnei hơ iă, kon pơlei mă lui kiơ̆, pơm kiơ̆. Hơdrô̆ kơdih, Cil Pam Ka Duyên hlôi pơjing đei mir pơgar pơtăm pơmur vă kon pơlei năm lăng, hŏk pơhrăm păng pơm kiơ̆.“Mưh đei jing đảng viên, ba đei dơ̆ng rơvơn vă băt hơdăh rim trong bơ̆ jang đơ̆ng Đảng, khôi luơ̆t Teh đak. Gơnơm đơ̆ng noh, ba jei chă pơtho tơbăt ăn kon pơlei bơ̆n băt lơ hloh dơ̆ng. Mă hơdăh, chă pơrô̆ hơvơn kon pơlei tơplih ‘long pơtăm, atŭm hăm chă rei pơtăm ‘long pơtăm hrôih vă atŏk tơ iung mŭk drăm ŭnh hnam. Hrei au, tơdrong hơrih sa kơ kon pơlei kon kông tơ̆ au hlôi dă ƀiơ̆ tơnap tap pơtêng hăm sơ̆”.

Ư̆h khan lăp hơdrô̆ pơlei Đạ Tro, lơ bơngai đảng viên anai oei tơ̆ rim pơlei pơla kơ tơring Đạ Nhim jei ƀôh hơdăh hơnăp jang păng sơnong jang đơ̆ng kơdih lơ̆m tơdrong pơm jŭk yŭk trong hơlau lơ̆m rim tơdrong. Lơ̆m au, kăl tơroi truh găh tơdrong jang tơplih ‘long pơtăm, tơgŭm dih băl atŏk tơ iung choh jang sa, tơgŭm dih băl năr jang, hơdrĕch, kih thuơ̆t jang sa ... Gơnơm đơ̆ng noh, tơdrong choh jang sa kơ Đạ Nhim hlôi đei lơ hơdrĕch ‘long pơtăm, roi năr roi chă jang sa kiơ̆ kĭ pơkăp răt iŏk păng pơm hơtŏk kơjă tơmam drăm. Đơ̆ng lăp chă pơtăm hơdrô̆ chehphe, truh dang ei, Đa Nhim hlôi lang să chă pơtăm đei 16ha ‘long pơgang Atisô, 6ha pơmur, 40ha pơkao kăt sơdrai, 300 ha ‘nhot sa rim kơloăi păng hloh 330ha ‘long sa plei. Kiơ̆ đơ̆ng đảng viên Cil Pam Ka Phương, Chi bộ thôn Đarahoa, tơring Đạ Nhim, ‘meh vă iŏk đei jơnei kơtang lơ̆m pơrô̆ pơrôp, tơdrong kăl hloh ‘noh “ đảng viên pơm jŭk yŭk trong hơlau, kon pơlei druh kiơ̆ đơ̆ng rŏng” kăl đei lăng kơjăp păng tơlĕch jang kơtang:“Nhôn pơrô̆ pơrôp ŭnh hnam kon kông lơ̆m pơlei lăng ba kơjăp atŏk tơ iung mŭk drăm-tơpôl. Ki hei, ‘long pơtăm tơm dơnơm kơ kon pơlei ‘noh chehphe, dang ei chă pơrô̆ hơvơn kon pơlei tơplih ‘long pơtăm kiơ̆ trong tĕch mơdro nhen ‘nhot sa, pro, tơ̆h rim kơloăi vă atŏk tơ iung kơjăp”.

Atŭm hăm atŏk tơ iung mŭk drăm, hơnăp jang pơm jŭk yŭk trong hơlau đơ̆ng đảng viên oei đei Đảng ƀô̆ tơring Đạ Nhim lăng kơjăp tơlĕch jang kiơ̆ jơnei lơ̆m rim tơdrong, lơ̆m au mă kăl hloh ‘noh rim tơdrong jang vă kơrŭn tơ iung pơjing tơring tơrang ‘nao, tơjur dơnuh kơjăp ‘lơ̆ng, tơlĕch jang kiơ̆ kơjăp tơgoăt tơgoăl hơdrĕch hơdrung, tơ iung pơjing khul jang chinh trĭ pran kơjăp iăp kơtag. Ƀok Kon Sơ Ha Vương, Kơdră chĕp pơgơ̆r Măt trân Tổ quốc tơring Đạ Nhim tơbăt, jĭ đơ̆ng tơdrong ou hlôi tơgŭm ăn Đạ Nhim tĕnh koăng tơpuh hŭt kĕ tơdrong pơngot rơvĕt, atŏk tơ iung đei jing tơring iŏk đei tơdrong pơkăp tơring tơrang ‘nao păng tŏk bŏk tơ iung pơjing tơring tơrang ‘nao ‘lơ̆ng liĕm. “Jang kiơ̆ trong bơ̆ jang đơ̆ng Đảng păng Khôi luơ̆t teh đak, khei năr au ki, Khul kơdră Đảng, Kơdră chĕp pơgơ̆rt tơring hlôi chă pơrô̆ pơrôp kon pơlei jang kiơ̆ ‘lơ̆ng tơdrong jang tơ iung pơjing tơring tơrang ‘nao. Hăm trong jang teh đak hăm kon pơlei vang jang, lơ trong nơnăm, gơng, hơlŏng đak đei ming man ‘lơ̆ng liĕm. Atŭm hăm mŭk drăm sơđơ̆ng, tơdrong hơrih sa păng jơhngơ̆m đon kon pơlei hlôi đei hơtŏk ‘lơ̆ng liĕm tôch kơ lơ”.

Gơnơm jang kiơ̆ ‘lơ̆ng hơnăp jang kơ đảng viên pơm jŭk yŭk trong hơlau, chông ba kon pơlei pơla jang kiơ̆ jơnei rim tơdrong jang kơ yuơ kơdră tơring tơlĕch ăn, mŭk drăm-tơpôl kơ tơring Đạ Nhim, apŭng Lạc Dương, dêh char Lâm Đồng tŏk bŏk hơnơ̆ng atŏk tơ iung kơtang kiơ̆ kơ năr.