Ƀok Nguyễn Thiện tơ̆ kueng kơphô̆ 7 phương Yên Thịnh, pơlei tơm Yên Bái sơnăm âu tŏk 90 sơnăm bơih mă lei adoi oei hơdơ̆r hơdah kơ khei năr pơtơm năm pơm ƀô đô̆i tơroi tơbăt, khei 3/1950, ah mă ƀok tŏk 16 sơnăm. Ƀok Thiện ăn tơbăt, tơdrong mă ƀok hơdơ̆r hloh lơ̆m tơdrong vang tơblah Điện Biên Phủ ‘noh atŭm hăm khul grŭp chơt hơ-iă đei ‘nhŏng Văn (Đại tướng Võ Nguyên Giáp) pơma dơnuh, tơtă gah tơdrong vei sơđơ̆ng tơroi tơbăt ăn tơdrong tơblah, minh sơnong jang kăp gĭt hloh: “Tôm anih linh đei hơvơn truh cham akŏm vă tơmơ̆ng ‘nhŏng Văn pơma dơnuh. ‘Nhŏng Văn tơroi gah 2 ‘măng tơblah âu ki, păng dang ei hơmet ăn ‘măng mă 3. Pơma dơnuh gah tơdrong kăl hơtŭm thoi noh, sư akhan gah tơdrong tơroi tơbăt athei tơnăp, ưh gơh tơhlăk tơhlĭn”.

Lơ̆m đon hơdơ̆r kơ ƀok Thiện, ah kơsơ̆ năr 7/5 jĭ jơ pơnĭt kăp gĭt hloh, đei kơtơ̆ng Phalăng kŭp kơ̆l yơ̆r ti, khul linh adoi sô̆ hơ-iă hloh: “Tơ̆ Anih tơm Pơgơ̆r ăn dôm anih linh; sư noh kơdră pơgơ̆r khul linh tơroi truh dôm anih rapor pơtơ̆ng, jah vă akhan sô̆ hơ̆k tơpă lah”.

Ƀok Phan Như Lục, rơneh sơnăm 1931 adoi oeit ơ̆ phương Yên Thịnh, pơlei tơm Yên Bái sơ̆ noh linh phao tih tơroi: lơ̆m khei năr tơblah hrat hrĭn tơ̆ Điện Biên Phủ dui phao tih mơ̆t lĕch, sir hơlŭng ‘măn tep... mă lei đon bơnôh ưh layơ lao, tơblah tơpăi đe ayăt pă đei trong vă chơ pơtruh tơmam drăm mah pơm ăn tơdrong răm ưh đei jơnei: “Gơnơm đei tơroi pơtho păng băt chăm đơ̆ng đe ‘nhŏng oh linh khei năr noh kơpal pơtho hơla mơ̆ng kiơ̆; lui ngeh tơnăp kơ ƀok Đại tướng; tơchơ̆t mơ̆t jang adoi gơh păng tơchơ̆t tơlĕch adoi ƀônh. Khul ayăt hiong đon kơlih ƀơm tang găn trong chơ pơtruh phao kơtuang tơmam drăm, chơ hăm trong gre păr noh ưh đei tôm tơmam drăm”.

Đon hơdơ̆r kơ Đei jơnei Điện Biên Phủ oei răk vei lơ̆m dôm tơmam drăm kăp gĭt hlôi đei anih jang kơpal kơ dêh char Yên Bái chă akŏm, pơdah tơ̆ anih Pơdah tơmam drăm so, hlôi pơdah dơ̆ng tơdrong nuih mơng noh kơ kon pơlei dôm hơdrung hơdrĕch dêh char Yên Bái tơgop hơtŭm hăm jơ̆p teh đak pơjing minh tơdrong đei jơnei Điện Biên Phủ. Ƀok Lý Kim Khoa, Phŏ Kơdră Anih Pơdah tơmam drăm so dêh char Yên Bái ăn tơbăt, dôm tơmam drăm đei akŏm noh lơ tơmam, đơ̆ng phao tih, phao iĕ, ao linh pơgăn ‘mrơ̆m, kơƀo pŭ phe truh dôm hla kơ pơlong jang kơ khul linh păng kon pơlei Yên Bái lơ̆m jăl sơnăm 1952 – 1954…

Lơ̆m noh đei dôm hla bar chih răk kăp gĭt nhen hla kơ đei sĭt pơrŏ ah kiĕng sơnăm 1953 kơ Jơnŭm pơgơ̆r anih ming man jăl trong 13 pôk ăn khul hơdruh tơdăm jang xung phong sơ̆ tơ̆ trong hơ̆ng Lũng Lô: “Hla kơ sĭt kiĕng noh sơ̆ đei yua vă chơng trong ăn khul gre chơ phao kơtuang, ‘mrơ̆m phao găn trong hơ̆ng Lũng Lô, năm truh Cò Nòi păng tŏk truh Điện Biên Phủ. Dôm tơmam drăm tơ̆ âu noh kăp gĭt kơlih hăp tơguăt hăm khul linh”.

Vih hơlơ̆k kơ jơhnơr hơrih, 70 sơnăm hơdrol ki, hăm tơdrong pơhlŭ pơhlôm đơ̆ng ayăt Phalăng, Anih tơm Chĭnh trĭ Ƀan châ̆p hanh Trung ương Đảng hlôi hop akŏm pơđăp păng tơlĕch Tơchơ̆t hơlen tơdrong jang tơblah Đông - Xuân 1953 – 1954. Dêh char Yên Bái khei năr noh đei Đảng păng Jơnŭm pơgơ̆r teh đak pơjao pơih jăl trong 13 đơ̆ng dơnŏk Phà Hiên (Tuyên Quang) năm truh Ba Khe tŏk truh trong hơ̆ng Lũng Lô. Hăm tơdrong tơblah pran kơtang, tơchơ̆t khŏm mă iung tơjră, Đảng ƀô̆ dêh char Yên Bái hlôi hăt hot vang pơđăp jang hadoi hơmet ăn tơdrong tơblah Đông Xuân. 

Tơmam drăm oei đei hrei âu jĭ tơdrong tơchơ̆t kơsô̆ 15 đơ̆ng Ƀan châ̆p hanh dêh char Yên Bái gah tơdrong keh đang tơjur iŏk thuê̆ pơyan jang ƀa, tơlĕch tơjur ah sơnăm 1953; Tơchơ̆t đơ̆ng Ƀan châ̆p hanh dêh char Yên Bái ah năr 2/5/1953 gah pơjing Jơnŭm pơgơ̆r asong bơngai jang tơ̆ Anih ming man jăl trong 13…. Yă Hoàng Thị Thanh Thủy, Kơdră Anih vei răk tơƀăk mong gah jơhnơr hơrih Yên Bái tơroi: “Hla bar chih răk đei lơ hla bar kăp gĭt tơroi truh tơdrong đei jơnei đơ̆ng khul linh păng kon pơlei dêh char Yên Bái tơgop pơjing đei jơnei Điện Biên Phủ. Lơ̆m noh đei dôm Tơchơ̆t kơ Tĭnh uy păng dôm hla bar chih tơchơ̆t đơ̆ng Anih pơgơ̆r iung tơjră kơ hanh chĭnh dêh char Yên Bái tơroi Jơnŭm pơgơ̆r teh đak tơgop jên răt tơmam drăm xa ‘măn ăn tơdrong tơblah”.

Tôm tơmam tơbăt kăp gĭt grasia đei Anih jang pơdah tơmam so kơ dêh char Yên Bái jang hơtŭm hăm Anih vei răk tơƀăk mong gah jơhnơr hơrih dêh char Yên Bái pơgơ̆r pơdah tơ̆ cham akŏm kơ Anih Pơdah tơmam drăm so dêh char Yên Bái ƀơ̆t tơbăt 70 sơnăm đei Jơnei Điện Biên Phủ vă kon pơlei tơ̆ tơring păng tơmoi truh tơmang băt hơdah hloh gah dôm tơdrong tơgop đơ̆ng khul linh păng kon pơlei dêh char Yên Bái lơ̆m tơdrong đei iŏk jơnei Điện Biên Phủ.