Tơdrong ou đei pơgơ̆r tơ̆ hơnih trong Anh hùng Núp păng Cham să Đại Đoàn Kết, pơlei tơm Pleiku - mĭnh hơnih ‘lơ̆ng hơ iă vă lang să nơ̆r tơbăt găh tơdrong kăp gĭt kơ chehphe Gia Lai. 40 hơnih mơdro sa păng kon pơlei choh jang sa lơ̆m jang chehphe hlôi đei hơdrơ̆r tơmam drăm păng tơmam drăm hăm hơmŏ vang tơgop jơhngơ̆m atŏk kơtang kơjă kăp gĭt kơ chehphe Gia Lai. Yă Nguyễn Thị Nga, Kơ iĕng Kơdră chĕp pơgơ̆r Hơp tak xah Choh jang sa Tĕch mơdro Nam Yang, tơbăt: “ ‘Moi kiơ̆ ‘măng pơgơ̆r ou, nhôn ‘meh vă tơƀôh tơbăt chehphe Đak Yang pơma hơdrô̆ păng chehphe Gia Lai pơma atŭm truh hăm bôl boăl lơ̆m teh đak păng teh đak đe, ba chehphe Gia Lai tŏk kơtang hloh dơ̆ng. Chehphe gĭt kăl.”

Hăm trong tơlĕch ăn pơm hơtŏk ‘lơ̆ng chehphe tơ̆ dêh char, Gia Lai Coffee Festival akŏm lơ̆m tơdrong huch lăng, ƀou lăng chehphe ‘lơ̆ng lơ liơ nhen: pơlong huch lăng chehphe ‘lơ̆ng, rơih găr chehphe; hơdrĕng chehphe păng ot chehphe; pơlong pơm đak chehphe păng pơma dơnuh hăm tơmoi ... Yă Nguyễn Thị Thanh Tâm, Kơdră Khul chĕp pơgơ̆r tơbăt:  “Gia Lai Coffee Festival jĭ mĭnh tơdrong pơgơ̆r tơpôl păng đĭ đăng dôm tơdrong pơgơ̆r ou gô đei pơgơ̆r kiơ̆ concept ‘noh đơ̆ng mir pơgar chehphe truh kơchŏk đak chehphe. ‘Meh vă ‘noh tơring pơtăm chehphe ‘lơ̆ng, Gia Lai đei bôl boăl băt lơ hloh dơ̆ng, adoi jing tơdrong lang să păng tơgoăt jang hơdoi kơ rim ŭnh hnam jang chehphe roi năr roi kơtang hloh dơ̆ng păng tơdrong tĕch răt chehphe lơ̆m tơring jei atŏk tơ iung kơtang hloh dơ̆ng, kơjăp hloh dơ̆ng.”

Đơ̆ng rŏng ‘măng mă blŭng pơgơ̆r jơnei lơ̆m sơnăm 2023, sơnăm ou Gia Lai Coffee Festival đei pơgơ̆r lơ tơdrong hloh dơ̆ng; jĭ hơnih bơngai răt yoa năm truh hơlen lăng găh găr chehphe păng dôm tơdrong tơroi tăp dăr găh chehphe kơ dêh char ... Kiơ̆ đơ̆ng ‘nhŏng Nguyễn Văn Hòa, Kơdră tang măt ăn Hơnih jang Lab găh Hơnih tơm Chă tơchĕng hơlen chehphe ‘lơ̆ng apŭng plĕnh teh tơ̆ Việt Nam, tơdrong pơgơ̆r ou roi năr roi hơmet pơ ‘lơ̆ng, pơm hơtŏk jơhngơ̆m đon hưch hanh hơmanh bơnê ăn tơpôl jang chehphe Gia Lai hơdrin yak truh đei lơ păng ‘lơ̆ng:“Dang ei, ĭnh iŏk vei lăng găh tơdrong jang huch lăng păng hơlen lăng chephe ‘lơ̆ng kơnê̆ lơ liơ kơ hloh 48 kơ loăi chehphe kơ dêh char Gia Lai vă rơih dôm hơdrĕch ‘lơ̆ng ăn sơnăm kơnh gô hơmet ăn ‘măng pơlong chehphe ‘lơ̆ng Gia Lai. Pơm lơ liơ vă pơtruh ăn jơhngơ̆m đon hưch hanh, hơdrin đĭ ai hăm jơhngơ̆m mơlôh, hưch hanh hơmanh bơnê hlŏh dơ̆ng vă atŏk tơ iung tơmam drăm chehphe ‘lơ̆ng tơ̆ Gia Lai”