Jăl jang 2021-2023, kon jên jang Trung ương pơjao ăn jang kiơ̆ Tơdrong jang tơm teh đak lơ̆m dêh char Dak Lăk ‘noh vă jê̆ 1.500 ti hlak jên, kon jên jang tơring hlŏh 130 ti hlak jên. Mă lei, dêh char ‘nao tơlĕch kon jên jang lăp hloh 800 ti hlak jên.

Tơdrong tơlĕch kon jên jang hiơ hiơ̆ hlôi pơm kơnê̆ truh bơ̆ jang tơlĕch jang kiơ̆ rim tơdrong jang tơ̆ tơring. Kiơ̆ tơchơ̆t dăr lăng hơlen đei tơbăt hơdăh, Khul bơ̆ jang dăr lăng tơdrong jang kiơ̆ Tơdrong jang tơm Teh đak atŏk tơ iung mŭk drăm-tơpôl tơring kon kông păng groi kông tơ̆ dêh char Dak Lăk đei 6 ‘nu. Lơ̆m 45 năr bơ̆ jang, jô̆ đơ̆ng năr tơbăt hơdăh Tơchơ̆t dăr lăng, khul dăr lăng gô athei tơbăt hơdăh dôm tơdrong jang, pơtruh ăn dôm tơdrong chih tơbăt hơdăh găh jang kiơ̆ Tơdrong jang tơm teh đak đơ̆ng sơnăm 2021 truh đĭ sơnăm 2023.