Truh hop akŏm đei 160 ‘nu bơngai tang măt, 21 ‘nu bơngai đei Kơdră chĕp kơ̆l kơpal rơih mât bơ̆ jang lơ̆m Khul kơdră pơgơ̆r păng 7 ‘nu bơngai jang lơ̆m Grŭp chĕp kơ̆l tơm dơnơm. Tơ̆ hop akŏm, Đại tá Trần Minh Trọng – Phó Chính ủy Quân khu V chih răk, pôk pơ ư dôm tơdrong jang đei mă Đảng ƀô̆ Anih chĕp kơ̆l pơgơ̆r khul linh dêh char Đắk Lắk iŏk đei lơ̆m jăl jang âu ki; kŭm nhen tơdrong hơmet ăn hop akŏm păng pơgơ̆r đang ‘lơ̆ng 12 Hop akŏm Đảng ƀô̆ găh sư lơ̆m jăl jang đơ̆ng 2025 – 2030 păng chih pơjing tơdrong tơchơ̆t lơ̆m Hop akŏm ‘măng mă âu.

Ƀok Nguyễn Đình Trung,  Bí thư Đảng dêh char, Bí thư Đảng ƀô̆ Anih chĕp kơ̆l pơgơ̆r khul linh dêh char Đắk Lắk ăn tơbăt, Tơdrong tơchơ̆t đơ̆ng Hop akŏm chih hơdăh “Tưk tơiung tơdrong juăt đơ̆ng khul linh tơblăh kơ dêh char Đắk Lắk kơtang nuih mơng; akŏm jơhngâm pơjing Đảng ƀô̆ rơgŏh ‘lơ̆ng, pran kơjăp; khul linh tơblăh kơtang, tơpăt ‘lơ̆ng, gơ̆h hơgei; khŏm jang đang ‘lơ̆ng tơdrong jang khul linh, vei kơjăp teh đak Việt Nam xã hội chủ nghĩa lơ̆m chăl ‘nao.