Pơm tơm jơ bơ̆ jang đei Trung tướng Nguyễn Hải Hưng, Kơ iĕng Kơdră Hơnih bơ̆ jang vei lăng Sơđơ̆ng teh đak păng sơđơ̆ng tơring kơ Kuô̆k hô̆i hăm ƀok Dương Tấn Hiển, Kơ iĕng Kơdră Hơnih bơ̆ jang vei lăng kon pơlei kơ pơlei tơm Cần Thơ.

Iung pơma tơ jơ bơ̆ jang, Trung tướng Nguyễn Hải Hưng tơbăt, tơdrong tơm kơ bơ̆ jang au ‘nŏh lơ̆m sơđơ̆ng trong nơnăm kơ lơ̆m pơlei tơm. Cần Thơ tŏk bŏk lơ̆m tơring Tơmăn đak kroong Cửu Long, đei lơ thoong đak kroong hăm duk chă kơdau trong đak lơ̆m khei năr au ki păng hrei au hơnơ̆ng tŏk kơtang, atŏk tơ iung păng adoi jei hơmơt ưh sơđơ̆ng trong nơnăm găh trong đak. Kơ yuơ lơ loh, Khul dăr lăng ‘meh vă Cần Thơ tơƀôh hơdăh dôm tơdrong jang tim gan gơ̆h, tơdrong tơhlăk tơhlĭn, ưh kơ trŏ lăp lơ̆m jang kiơ̆ trong jang tơgŭm djru, khôi luơ̆t, đơ̆ng noh khul chih akŏm nơ̆r vă ‘moi kiơ̆ ‘măng dăr lăng đei hơmet pơ ‘lơ̆ng hloh dơ̆ng lơ̆m tơdrong pơm sơđơ̆ng trong nơnăm.