Khŭl bơ̆jang kơ khŭl kơdră chĕp kơ̆l dêh char Gia Lai hlôi pơgơ̆r soh plang nhang tơ̆ hơnih soi kơ Ƀok Hồ (hơnih Cham să Đại Đoàn Kết, pơlei tơm Pleiku). Đơ̆ng rŏng kơ ‘noh, khŭl hlôi dan pơkao tơ̆ hơnăp Rup man ƀok Núp, bơngai kon gơh hơgei kơ hơdrĕch Bahnar, pơtih ăn hơdăh ‘lơ̆ng ăn jơhngơ̆m đon tơgoăt tơgoăl hơdrĕch hơdrŭng lơ̆m 2 ‘măng tơblăh hŭt ayăt Phalăng păng Mi păng lơ̆m tơdrong jang pơjing păng vei lăng teh đak đơ̆ng rŏng âu.

Khŭl kŭm hlôi truh soh nhang ƀlŏk hơdơ̆r kơ nhap ƀok Núp nuih mơng tơ̆ hơnih soi kơ ŭnh hnam, tơ̆ trong iĕ 101, trong Phan Đình Phùng, pơlei tơm Pleiku, dêh char Gia Lai. Tơ̆ âu, khŭl bơ̆jang hlôi blŏk hơdơ̆r kơ dôm tơdrong plang hơkâu tih tên đơ̆ng nhap ƀok Núp ăn kach mang; pơlung jơhnơr kon sâu Ƀok Núp pơtăl dơ̆ng păng hơtŏk tơdrong joăt joe.