Bơngai tăh hla apŭng Tiên Phước, dêh char Quảng Nam akhan, dôm sơnăm au ki, Đảng păng Teh đak lăng ba kơjăp bơngai đei iŏk yua ăn teh đak, mă lei, lơ bơngai đei iok yua ăn kĕch mang tim đei sa hơpăh tơdrong tơgŭm djru kơ yuơ đei lơ tơdrong phara dih băl pơm ăn.

Tơdrong tơgŭm djru hăm rim ƀô̆ đô̆i so, ƀô̆ đô̆i rơka, bơngai lôch dŏng teh đak, bơngai đei iŏk yua ăn teh đak, dôm bơngai răm ƀrơ̆m phao pơgang dioxin pơm ăn oei tŏ sĕt pơtêng hăm tơdrong đei atŭm kơ tơpôl. Kiơ̆ đơ̆ng Kơ iĕng Kơdră chĕp pơgơ̆r Kuô̆k hô̆i Nguyễn Đức Hải, dêh char Quảng Nam ‘noh jing tơring jang tơnăp tơdrong jang kĕch mang, tơring đei măt bơngai lôch dŏng teh đak păng yă mĕ Việt Nam nuih mơng lơ hloh lơ̆m teh đak. Kơ yuơ lơ loh, ưh kơ lê̆ ŭnh hnam đei iŏk yua ăn kĕch mang ưh kơ đei sơng iŏk tơdrong tơgŭm djru đơ̆ng teh đak ôh. Kơ iĕng Kơdră chĕp pơgơ̆r Kuô̆k hô̆i athei Hơnih bơ̆ jang vei lăng Bơngai rơka-tơpôl dêh char Quảng Nam dăr lăng hơlen, iung jang hloi xek tơlang tơdrong đei iŏk yua sa hơpăh ăn rim bơngai đei tôm rơvơn.