Iung pơma tơ̆ jơ bơ̆ jang, Kơ iĕng Thủ tướng Teh đak Nguyễn Hòa Bình hôn bơnê kơtang tơdrong drơ̆ng mĭh nơ̆r, tơgoăt mĭnh ƀơ̆r đon păng pơm kiơ̆ kơjăp bơ̆ jang chĕp pơgơ̆r, iung jang hơdoi tơlĕch jang kiơ̆ Tơdrong tơchơ̆t hop akom mă 11 kơ Khul kơdră chĕp pơgơ̆r Trung ương Đảng jăl XIII kơ rim dêh char, mă kăl bơ̆ jang iung jang hơdoi lơ̆m jang kiơ̆ tơdrong jang hơgrop, hơmet pơ ‘lơ̆ng khul bơ̆ jang, hơmet ăn ‘lơ̆ng rim tơdrong ăn Hop akom tih kơ Đảng rim hơnih. Găh bơ̆ jang hơmet ăn khul kang ƀô̆ bơ̆ jang đơ̆ng rŏng hơgrop jing mĭnh, Kơ iĕng Thủ tướng Teh đak Nguyễn Hòa Bình sơkơ̆t hơdăh: ‘Nou jing tơdrong jang kăl hloh, rim tơring kăl jang kiơ̆ kơjăp rim tơdrong tơchơ̆t đơ̆ng Đảng păng Teh đak vă pơm kiơ̆ ƀlep, kơjăp ‘lơ̆ng, sơđơ̆ng tơpăt, rơhav. Kăl lăng tơdrong pơkăp ‘lơ̆ng kơ khul kang ƀô̆ bơ̆ jang ‘noh tơm hloh, sơđơ̆ng tơdrong pơkăp ‘lơ̆ng găh bơ̆ jang gơ̆h, ‘lơ̆ng păng trŏ lăp ƀar păh rim tơring; lăng kơjăp tơdrong pơprŏ ăn kang ƀô̆ tơm dơnơm tơ̆ tơring, trŏ lăp hăm tơdrong bơ̆ jang ‘nao.