Tơ̆ jơ pơma nuh, 2 ‘nu Kơdră tơchĕng ‘lơ̆ng dôm hơyak tŏk lơ̆m tơdrong pơvei đơ̆ng Đảng, 2 teh đak Việt Nam – Trung Quốc khei ‘năr âu ki, kiơ̆ đơ̆ng pơma nuh âu vă pơm hơtŏk tơdrong pran ‘lơ̆ng đơ̆ng 2păh, hơtŏk hlŏh dơ̆ng tơdrong pơvei jang hơdoi đơ̆ng dôm anih tơm, anih jang kơpal, tơring tơrang kơ Việt Nam hăm dêh char Vân Nam tơ̆ hơnăp kơnh.

Kơdră Quốc hội Vương Đình Huệ pơma hơdăh trong jang ưh đei tơplih đơ̆ng Đảng, Teh đak Việt Nam găh hơnơ̆ng pơm pơ ‘lơ̆ng hlŏh dơ̆ng păng hơtŏk tơdrong pơvei ‘lơ̆ng hơiă đơ̆ng 2 teh đak jê̆ băl, jang hơdoi gĭt kăl tôm tơdrong, mĭnh tơpôl vang tơgŭm băl tơ̆ ning mônh kơnh kơ Việt Nam - Trung Quốc ‘nŏh jĭ tơdrong tôch gĭt kăl. Kơdră Quốc hội hơpơi ‘mĕh 2 păh vang jang hơdoi mă kơjăp lơ̆m tơdrong vei lăng tơring sơlam kiơ̆ 03 Hla ar chih găh tơring sơlam tơ̆ kông păng dôm tơdrong drơ̆ng nơ̆r đei ƀơm truh, vang sek tơlang pơ ‘lơ̆ng dôm tơdrong ưh kơlăp băl tơ̆ tơring sơlam, pơjing trong sơlam sơđơ̆ng, rơngei hiôk hian.