Tơ̆ jơ sơng, 2 păh akhan, tơdrong pơvei jang hơdoi gĭt kăl tôm tơdrong Việt Nam păng Hungary lơ̆m dôm sơnăm âu ki tŏk pran ‘lơ̆ng, mă loi găh chinh trĭ – jang tơbôl, mŭk drăm – tĕch mơdro, pơtho pơhrăm, jŏh ayŏ kơ dŏ xoang. 2 teh đak hơnơ̆ng pơgơ̆r pơma nuh ăn dôm khul grŭp, mă loi jĭ dôm khul jang tih. Tơdrong pơgơ̆r ăn khul pơma nuh hăm băl vang tơgop gĭt kăl, pơm hơtŏk tơdrong pơvei 2 tĕh đak tŏk ‘lơ̆ng hlŏh dơ̆ng.

Kơdră Quốc hội athei 2 păh hơnơ̆ng bơ̆ jang kiơ dôm tơdrong drơ̆ng nơ̆r jang hơdoi đơ̆ng Quốc hội 2 teh đak đei kĭ lơ̆m sơnăm 2022. Kơdră Quốc hội thơthou ăn teh đak Hungary iŏk jang ‘lơ̆ng sơnăm pơm Kơdră chĕp kơ̆l pơlơ̆h băl kơ Anih vei lăng EU, hơpơi ‘mĕh hăm kơchư̆k jang ‘nâu, Hungary gô pơm hơtŏk tơdrong pơvei jang hơdoi đơ̆ng EU păng ASEAN păng tơdrong pơvei jang hơdoi đơ̆ng Việt Nam păng EU.