Năr pơh, kon pơlei plei Ia Nueng, xăh Biển Hồ, pơlei tơm Pleiku akŏm tơ̆ hnam hŏk hôp pơlei vă tơgop nơ̆r hăm trong jang proh hơmet anih bơ̆jang. Kon pơlei đei măt vă tơgop nơ̆r hăm trong proh hơmet anih bơ̆jang. Ƀok Ksor Kroyh, 64 sơnăm, tơƀôh tơdrong drơ̆ng lăp tơ̆ hơnăp trong jang pơih să xăh Biển Hồ ‘moi kiơ̆ tơdrong tơmơ̆t hơdai dôm xăh Nghĩa Hưng, xăh Chư Đang Ya (apŭng Chư Păh) păng xăh Hà Bầu (apŭng Đăk Đoa), hơdai hăm hŭt pơlei tơm hơlam ‘noh pơlei tơm Pleiku. Kiơ̆ kơ ƀok, tơdrong tơplih âu gô tơgŭm kon pơlei hơmet pơ ‘lơ̆ng dôm hla ar bơ̆jang hrĕnh hloh. Mă lei, đơ̆ng rŏng tơmơ̆t hơdai, kơsô̆ kon pơlei kon kông lơ̆m xăh ‘nao gô tŏk hloh 2 ‘măng, tŏk 47% kơna kăl kơ hơtŏk loi dơ̆ng khŭl kang ƀô̆ ‘noh bơngai kon kông, mă loi ‘noh jĭ tơ̆ tơdrong jang tư pháp, vă tơgŭm kon pơlei.

Ƀok Ksor Kroyh lui ngeh: “Tôch kơ hơiă, hŭt lê̆ tŏk bŏk ‘noh ‘lơ̆ng. Kon pơlei kăl kơ kiơ ‘noh jang kơtă, hoei kơ tơhlăk tăk. Kăl kơ hơtŏk loi dơ̆ng kang ƀô̆ păih tư pháp. Tơdăh bơngai Jarai ‘noh hlôh nơ̆r Jarai hloh, Yuăn ‘noh hơiă găh hla ar, mă lei mă ưh kơ rơđăh nơ̆r kon kông. Ĭnh ‘meh vă kăl kơ hơtŏk loi dơ̆ng kang ƀô bơngai kon kông”.

Vă iŏk nơ̆r tơgop đei iŏk yua, khŭl kơdră tơring păng dôm khŭl grŭp tơ̆ xăh Biển Hồ hlôi tơlĕch jang tơroi tơbăt jơ̆p jang. Hla ar tơm păng hla ar roi tơbăt tơdrong jang proh hơmet đei tăh lơ̆m trang kơtơ̆ng ang điện tử păng pơklep tơ̆ anih bơ̆jang, hnam hŏk hôp tơpôl,... tơgŭm kon pơlei gơh băt kơtơ̆ng ang tôm.

Yă R’Com H’Myữ - Kơdră Anih jang Mặt trận Tổ quốc Việt Nam xăh Biển Hồ - roi tơbăt; kơmăy pơre nơ̆r tơ̆ tơring, dôm mạng tơpôl, adoi hơdrin roi tơbăt, pơvih pơvăn ăn ‘măng iŏk nơ̆r tơgop âu: “Rim năr, lơ̆m 5jơ 1 puăt pơnĭt pơđĭ tơ̆ pơgê păng kơsơ̆, aloa pơre nơ̆r kơ xăh tă kơ pơih pơre ngăl. Kiơ̆ kiơ̆ đŏk hla ar tơroi, kiơ̆ đơ̆ng zalo păng facebook, ‘noh mặt trận tổ quốc hlôi tơlĕch jang ăn kơ đe kơdră khŭl bơ̆jang mặt trận tơ̆ pơlei găh trong jang đơ̆ng rim tơring găh tơmơ̆t hơdai dêh char păng pơlei tơm Pleiku, kŭm nhen xăh phường. Hrei ‘nâu kon pơlei hlôi băt hơdăh đei tơdrong proh hơmet”.

Kŭm hăm xăh Biển Hồ, dôm anih jang tơ̆ xăh lơ̆m dêh char Gia Lai kŭm tơlĕch jang iŏk nơ̆r tơgop đơ̆ng bơngai tăh hla găh trong jang tơmơ̆t hơdai dôm xăh. Dôm trong jang đei tơmơ̆t yua ‘lơ̆ng, đei hloi yơ̆r ti tơpăt tơ̆ dôm ‘măng hop akŏm tơpôl, dăh mă ăn kơ phiê̆u truh tơ̆ hnam hăm dôm bơngai tăh hla ưh kơ gơh năm kơtă. Hơnăn bơngai tăh hla đei dăr hơlen tôch kơ hơlen, vei sơđơ̆ng ưh kơ đei lon bơngai hơyơ.

Hơdrol ‘noh, tơ̆ Hop akŏm ‘măng mă 19 Khŭl chĕp kơ̆l pơgơ̆r Đảng bộ dêh char Gia Lai jăl XVI (pơih să), dêh char Gia Lai hlôi drơ̆ng nơ̆r trong jang tơ jur đơ̆ng 218 anih bơ̆jang tơ̆ xăh jur oei pă 77 anih jang. Đơ̆ng rŏng kơ jang đang tơdrong iŏk nơ̆r tơgop, Jơnŭm pơgơ̆r kon pơlei tơ̆ xăh păng Anih jang Mặt trận Tổ quốc Việt Nam dăr hơlen, akŏm, gơih ăn apŭng păng dêh char set hơlen, tơchơ̆t lơ̆m dôm ‘măng hop akŏm kơ jơnŭm pơgơ̆r kon pơlei rim tơring. Mưh anih bơ̆jang ‘nao đei pơjing gô bơ̆jang kiơ̆ hloi dôm hơyak pơtăl dơ̆ng vă jang đang tơdrong jang kang ƀô̆, ưh kơ lê̆ pơdơh tơdrong jang pơvih pơvăn ăn kon pơlei.