Vă jê̆ 6000 Khul (hăm hlŏh 252.000 ‘nu bơngai), jĭ bơngai tang măt ăn Kơdră chĕp kơ̆l Đảng, Teh đak, dôm anih tơm, anih jang kơpal, khul grŭp tơpôl, tơring tơrang, khul linh kon pơlei, dôm Khul jang tơbôl, bơngai tang măt ăn dôm anih jang păng bôl boăl lơ̆m apŭng plenh teh, kon pơlei vang truh hơpong, gơih kơvang pơkao, pơtruh nơ̆r sơ ‘ngon hăm unh hnam Tổng Bí thư Nguyễn Phú Trọng.

Lơ̆m jơhngâm đon lơ bơngai mưh bou truh Tổng Bí thư, đĭ đăng tơtă tơƀôh jơhngâm đon kŭp yom, ‘mêm kơeng kơ 1 ‘nu bơngai gơ̆h hơgei, đei jơhngâm đon ‘lơ̆ng, hlôi plang đĭ jơhngâm ăn tơdrong jang tơiung pơjing păng jang tŏk teh đak. Lơ bơngai akhan, Tổng Bí thư Nguyễn Phú Trọng jĭ 1 ‘nu kơdră chĕp kơ̆l tôch rơgei, hơnơ̆ng adrin hơnhăk đon rơgei đơ̆ng kơdih vă pơvih ăn teh đak, oei xa tơpăt ‘lơ̆ng hăm kon pơlei dơ̆ng. Oei hăm jơhnơr mơlôh hrei ‘nâu, lơ bôl boăl akhan, hăm dôm tơdrong tơgop, bơ̆ jang plang đĭ jơhngâm hơnơ̆ng ăn tơdrong jang tŏk teh đak, Tổng Bí thư Nguyễn Phú Trọng ling lang jĭ bơngai ‘lơ̆ng, gơ̆h hơgei, tưk tơiung jơhngâm đon hưch hanh vă jơhnơr mơlôh hŏk pơhrăm păng jang kiơ̆. Hăm dôm tơdrong jang hơdăh ‘lơ̆ng, chăl mơlôh hrei ‘nâu athei adrin, pơtâp pơhrăm kiơ̆ jơhngâm đon Tổng Bí thư vă gơ̆h jing kon pơlei ‘lơ̆ng, đei lơ tơdrong plang pơyơ̆r ăn tơpôl.

Đoàn viên A Tống Tiến Quân, Khul pơgơ̆r bơ̆ jang, Anih jang đoan dêh char Kon Tum ăn tơbăt, khei 7 sơnăm ‘nâu, kŭm hăm teh đak chông ba Tổng bí thư Nguyễn Phú Trọng vih hăm yă ƀok sơ̆ păng tơƀôh jơhngâm đon ‘mêm bơnê hăm tơdrong tơgop tih tên đơ̆ng Tổng Bí thư, inh roi đei đon hơmet kơdih kâu păng adrin hlŏh dơ̆ng: “Mih Nguyễn Phú Trọng jĭ 1 ‘nu bơngai jang tih ‘lơ̆ng vă sơnăm mơlôh adrin jang kiơ̆ tŏk jing 1 ‘nu đoàn viên ‘lơ̆ng, ning mônh kơnh jing 1 ‘nu đảng viên đei jơhngâm đon tơpăt ‘lơ̆ng, hơnơ̆ng hơnhăk tơdrong đei yoa ăn teh đak. Nơ̆r chih tơblang păng dôm tơmam đơ̆ng Mih ‘măn ăn, jơhnơr mơlôh nhôn vă adrin iŏk yoa, jang kiơ̆ truh đĭ chăl bơ̆ jang đơ̆ng kơdih”.

Đĭ chăl arih ƀok Tổng Bí thư Nguyễn Phú Trọng hlôi bơ̆ jang yoa kon pơlei, yoa teh đak, 1 ‘nu bơngai tơchĕng hơlen, bơngai chih pơcheh, bơngai chĕp kơ̆l rơgei, 1 ‘nu bơngai đei jơhngâm đon ‘lơ̆ng tih, đĭ jơhnơr arih xa tơpăt ‘lơ̆ng, ưh đei pơang pơrŏ păng hơnơ̆ng vei lăng bưng ai kơdih. Mă đơ̆ng Tổng Bí thư Nguyễn Phú Trọng đĭ lôch hơchăng bơih, mă lei dôm tơmam đơ̆ng Tổng Bí thư ‘măn ăn oei đei hơnơ̆ng lơ̆m jơhngâm đon rim bơngai Việt Nam păng tơdrong kŭp yom đơ̆ng bôl boăl lơ̆m apŭng plenh teh./.