Pơma tơ̆ Lêh tơbăt, Kơdră dơnơm chĕp kơ̆l Radiô nơ̆r pơma Việt Nam Đỗ Tiến Sỹ tơƀlŏk dơ̆ng jơhnơr arih pơjing Radiô nơ̆r pơma Việt Nam, đunh kơ âu 79 sơnăm, lăp 5 năr đơ̆ng rŏng Kơdră Hồ Chí Minh đŏk nơ̆r tơbăt rơngei hiôk hian roi tơbăt hơdăh hăm đĭ đăng kon pơlei lơ̆m teh đak păng apŭng plĕnh teh găh tơdrong pơjing đơ̆ng teh đak Việt Nam Dân chủ Cộng hòa, ƀlep ƀơ̆t 11jơ 1 puăt ‘năr dơ̆ng ‘năr 7/9/1945, Radiô nơ̆r pơma Việt Nam (VOV) tơtơm pơjing hăm jơ pơih pơre blŭng a hăm nơ̆r Yuăn, nơ̆r Anh păng nơ̆r Phalăng hăm nơ̆r krao “‘Nâu jĭ nơ̆r pơma đơ̆ng Việt Nam, pơih pơre đơ̆ng Hà Nội, anih tơm teh đak Việt Nam dân chủ cộng hòa”. Lơ̆m 2 ‘măng tơblăh hŭt ayăt Phalăng păng Mi, Radiô nơ̆r pơma Việt Nam hlôi tơklăh 14 ‘măng vă vei sơđơ̆ng ăn hơyuh pơre nơ̆r kơ teh đak.

Yak hloh 79 sơnăm jang đei păng hơtŏk tơiung, rim kang ƀô̆, bơngai chih kơtơ̆ng ang, bơngai jang ki thuơ̆t, bơngai joh hơri păng bơngai jang kơ Radiô nơ̆r pơma Việt Nam hlôi 1 jơhngơ̆m đon, yak hloh băt dôm yơ mơmat tat long nol vă pơjing Anih Radiô nơ̆r pơma Việt Nam pran kơjăp tơgăl hăm đon lui ‘mêm đơ̆ng đĭ đăng Đảng, đĭ đăng kon pơlei. Radiô nơ̆r pơma Việt Nam jing “Nơ̆r pơma kơ teh đak”, kơ Rơngei, Hiôk hian, jĭ nơ̆r pơma kơ Đảng, Teh đak păng kon pơlei Việt Nam, bơngai buăl lui ngeh kơ bôl buăl apŭng plĕnh teh.