Phó Thủ tướng Trần Hồng Hà athei plt Hải Phòng vei kơjăp tơdrong trư̆k gak, chih tơroi rim tơdrong găh trong kial tơhlu, ưh gơ̆h lăng pơhơi. Phó Thủ tướng pơma hơdăh, mă đơ̆ng plt Hải Phòng hlôi đei trong tơjră hăm ‘mi kial hơbŭt hơbang bơih; mă lei oei athei đei đon kơchăng hăm rim tơdrong krê nhen ưh đei unh điên, đak tŏk tih, kơchăng hăm tơdrong chă pơma nuh, vang jang hơdoi đơ̆ng dôm anih jang vă sek tơlang rim tơdrong tơdăh đei.

Kiơ̆ Anih vei lăng bơnơ̆ găn đak, Anih tơm vei lăng choh jang xa păng atŏk tơiung tơring tơrang, tơjră hăm ‘mi kial kơsô̆ 3, jô̆ truh kơsơ̆ 6/9, dôm dêh char, plt đei: Quảng Ninh, Hải Phòng, Thái Bình, Nam Định, Ninh Bình hlôi chông tơlĕch 37.188 ‘nu bơngai đơ̆ng anih rong ka, hnam gak vei lăng sơlŭng rong ka, dôm hnam ưh đei kơjăp ‘lơ̆ng tơ̆ tơring tơter đak dơsĭ, tơring thŭng, krê hơmơt tŏk oei tơ̆ tơring sơđơ̆ng. Khul linh vei lăng tơring sơlam tơ̆ đak dơsĭ jô̆ hơlen, pơtho tơƀôh ăn hlŏh 51 rơbâu tŏ ƀato, hăm hlŏh 220 ‘nu bơngai băt trong ‘mi kial kơsô̆ 3 tơhlu vă kơchăng veh ver, truh dang ei, đĭ đăng ƀato đĭ mât dơ̆ng lơ̆m anih kơ ‘nơp bơih. Dôm dêh char, plt đơ̆ng Quảng Ninh truh tơ̆ Nghệ An păng Quảng Bình hlôi đei nơ̆r kâm ưh ăn lĕch tơ̆ đak dơsĭ đơ̆ng ‘năr 6/9.