Hơnơ̆ng dôm sơnăm ‘nâu, bri ‘long kơ Công ty jang ‘long Krông Bông, apŭng Krông Bông- găh hơlĕch pơbăh dêh char Đắk Lắk, jing tơring đei tơdrong kŏh phă bri ‘long dêh hloh. Lơ chơ ƀôt bri sơlam hăm dôm apŭng Ea Kar, M’Đrắk (dêh char Đắk Lắk) păng apŭng Khánh Vĩnh (dêh char Khánh Hoà), mă loi jĭ dôm hơgăt bri ‘long tơter Trong gre kơdâu hrĕnh Khánh Hòa - Buôn Ma Thuột oei ming man, bri ‘long răm kơ đe kŏh phă tôch dêh. Lơ chơ ƀôt bri đe kŏh phă pơgŏh, sŏh pơm mir. Lơ tơnơm ‘long đei koh phă ‘nao đei sŏh hŭt, tih đơ̆ng tŏ blu truh 1,2 ‘nu kuăr.

Ƀok Bùi Quốc Tuấn, Kơdră chĕp kơ̆l Công ty jang ‘long Krông Bông ăn tơbăt, hlŏh 2.000 unh hnam, dang 17.000 ‘nu bơngai đơ̆ng dôm tơring găh tu mât lơ̆m bri ‘long yoa công ty vei lăng, jing đei tơdrong kŏh phă bri ‘long âu. Kŭm hăm ‘nŏh, lơ tơdrong jang tih găh hnam kơmăy unh điên, trong gre trong, đei trong tơdrong iŏk pơdreu teh oei, teh choh jang xa kơ kon pơlei mă lei tam mă jang ‘lơ̆ng tơdrong pơjing tơring oei xa ‘nao, choh jang xa ‘nao, kơna kon pơlei chông băl mât tơ̆ bri găh công ty kŏh phă, tơgar iŏk teh.

“Hơnơ̆ng dôm sơnăm tơjê̆ âu tơlĕch lơ tơdrong jang tih, ‘nŏh jĭ man dơnâu đak Krông Pách thượng, pơm trong Đông Trường Sơn, păng tih hlŏh jĭ tơdrong jang pơm trong gre kơdâu hrĕnh Khánh Hòa - Buôn Ma Thuột. Găh bri ‘long Ea Tlong jĭ tơring pŭ lơ tơdrong kơhret hlŏh đơ̆ng trong gre kơdâu hrĕnh ‘nŏh jĭ tơdrong kon pơlei săy ƀôt pơgang pơlôch ‘long bri, tôch mơmat hăm tơdrong jang vei lăng bri. Păng tơdrong răm ‘nŏh jĭ hiong bri ‘long tôch hrĕnh”.

Tơ̆ găh Pơmât Kơtu Đắk Lắk, hlŏh 5.800ha lơ̆m kơsô̆ 8.800ha bri kơ Công ty jang ‘long Buôn Ja Wầm (apŭng Cư M’Gar) ưh pă đei bri ‘long kiơ. Dang 3.000ha oei đei dơ̆ng, đei năng jĭ đei bri mă lei hơ ngreu hơngrônh pă đei ‘long tih bơih. Hrei ‘nâu, bri tơ̆ âu oei hơnơ̆ng đei đe kŏh phă đĕch. Chơƀôt bri đei đe kŏh phă roi xă, lăp hơtăih kơ anih vei lăng 2,3 hrĕng met đĕch.

Ƀok Trần Hồng Minh, kăn ƀô̆ Anih vei lăng bri kơsô̆ 1, Công ty jang ‘long Buôn Ja Wầm ăn tơbăt, dôm bơngai kŏh phă bri tơjê̆ âu ưh kơ hli bu. Ưh jô̆ hơtăih dăh mă jê̆, mưh ƀôh ƀât yơ oei đei bri ‘nŏh kŏh phă hloi. Mưh đe chă ƀôh, dôm bơngai âu tơjră plơ̆, druh teh bơngai vei lăng bri. Kơdih kâu ƀok Minh adrol ki kŭm đei dôm jĭt ‘nu bơngai druh teh măh chơ hơmet tơ̆ hnam pơgang hloi: “Kon pơlei đơ̆ng nai truh đe sư mât oei tơ̆ jơ̆p tơring lơ̆m bri, đe sư tơgar iŏk teh bri kư̆ kă kơna vei lăng tôch pơmat tat. Hrei ‘nâu oei tôch dêh, kơdih kâu inh năm jang, đe ƀôh ‘nŏh chông băl năm tơ̆ anih gak âu teh inh măh năm hơmet tơ̆ hnam pơgang, đe sư ưh đei hli bu”.

Ƀok Nguyễn Công Văn, Phŏ Kơdră vei lăng kon pơlei apŭng Cư M’Gar, dêh char Đắk Lắk tơroi truh tơdrong tôch pơngơ̆t tơ̆ tơring ƀât mă kon pơlei mât oei kư̆ kă dui băl kŏh phă bri ‘long, tơgar iŏk teh. Ƀât mă bri ‘long krê kơ đe kŏh phă tôch kơ dêh ‘nŏh khul vei lăng bri pơdơ̆h jang roi tŏk. Lơ tơ ‘ngla bri hrei ‘nâu ưh kĕ vei lăng bri. Bri ‘long tơ̆ apŭng tôch kơ krê hiong pơgŏh đĭ: “Đei lơ bơngai pơdơ̆h jang pơm ăn dôm công ty jang ‘long tơ̆ apŭng Cư M’Gar jing ưh kơ kĕ vei lăng bri. Tơ̆ apŭng Cư M’Gar bri ‘long nhen vă răm kơ đe kŏh phă đĭ bơih. Dăr lăng tơ̆ yăn âu, bri ‘long hiong, răm kơđe kŏh phă đơ̆ng dang yơ kŭm ưh kơ băt ‘năi.”

Ƀât mă bri ‘long răm kơ đe kŏh phă tôch dêh, lơ tơ ‘ngla bri tơ̆ Đắk Lắk tơtă pră hơchăng lê̆ tơdrong vei lăng bri. Ƀât lăp, yoa hli pŭ hơnăp jang, lơ tơ ‘ngla bri ưh pơ̆n roi tơbăt rim tơdrong đei tơpă tơ̆ yăn âu, kơna mưh anih jang kơpal truh hơlen ‘nŏh bri 'long đĭ hiong đĭ bơih, teh bri đe đĭ tơgar iŏk chă pơtăm bơ̆n 'long nai bơih kơna sek tơlang tôch pơmat tat. Ƀok Lê Văn Nuôi, Phŏ Kơdră vei lăng kon pơlei apŭng Buôn Đôn, dêh char Đắk Lắk, roi tơƀôh tơdrong đei tơpă tơ̆ yăn âu: “Blŭng a ‘nŏh jĭ ưh kơbăt kiơ, hơlen năng ưh kơ đĭ, mă 2 ôn tơdrong glăi, đon ưh kơ tơnăp. Tơdrong kon pơlei mât oei kư̆ kă kŏh phă bri tơ̆ âu đei đunh 10 sơnăm ‘nâu bơih mă lei truh dang ei ‘nao băt, thoi noh ‘nŏh yoa tơ ‘ngla bri hli pŭ yoch kơna ưh pơ̆n tơroi ăn khul kơdră tơring, ăn dôm anih jang kơpal kơ dêh char vă gơ̆h chă trong hơmet pơ ‘lơ̆ng. Mưh ƀôh thoi noh ưh băt hơnăp jang âu bu athei pŭ, đang kơ ‘nŏh hơnơ̆ng tơpŭ ăn băl”.

Sơnăm 2023 khul jang kơ pal dêh char Đắk Lắk chă ƀôh, pơm hla ar hăm 1.036 tơdrong pơm glăi luơ̆t vei lăng bri, 246ha bri ‘long răm kơ đe kŏh phă. Kơsô̆ tơdrong glăi păng teh bri ‘long răm kơ đe kŏh phă đei chih jô̆ tam mă trŏ hăm yăn âu. Anih vei lăng kon pơlei dêh char Đắk Lắk kŭm akhan, tơdrong chă ƀôh, tang găn, sek tơlang dôm tơdrong pơm glăi luơ̆t vei lăng bri ‘long oei đei lơ tơdrong ưh kơ ‘lơ̆ng. Tơdrong kŏh phă, chơ chuĕn, tĕch mơdro ‘long bri glăi luơ̆t, kŏh phă tơgar iŏk tĕh bri oei đei hơnơ̆ng, tôch kơ dêh.

Ƀok Nguyễn Hoài Dương, Kơdră jang lơ̆m Anih chĕp kơ̆l đảng dêh char, Kơdră Anih vei lăng choh jang xa păng atŏk tơiung tơring tơrang dêh char Đắk Lắk ăn tơbăt, tơdrong pơngơ̆t hlŏh hrei ‘nâu jĭ tơdrong kon pơlei mât oei kư̆ kă, chă kŏh phă bri, tơgar iŏk teh đei tơ̆ jơ̆p tơring lơ̆m dôm apŭng. Tơdrong răm đơ̆ng tơdrong ‘nâu tôch tih mă lei tơring tam mă đei trong jang ‘lơ̆ng hlŏh, kăl đei trung ương tơgŭm ăn.

“Lơ tơring oei đei kon pơlei mât oei kư̆ kă tam mă đei hơmet ming, pơjing pơlei oei xa sơđơ̆ng kơna pơm tơlĕch lơ tơdrong răm nhen kŏh phă bri, tơgar iŏk teh bri glăi luơ̆t. Tơ̆ hơnăp tơdrong ‘nâu, dêh char pơtho ăn dôm anih jang kơpal, dôm tơring pơjing dôm tơdrong jang pơjing tơring oei xa sơđơ̆ng ăn kon pơlei mât oei kư̆ kă. Mă lei, hrei ‘nâu oie tơƀâp lơ tơdrong pơmat tat, jên jang đơ̆ng Trung ương ăn dôm tơdrong jang pơjing tơring oei xa sơđơ̆ng ăn kon pơlei mât oei kư̆ kă oei tŏ sĕt”.

Hăm tơdrong kŏh phă bri ‘long kư̆ kă, bơngai kŏh phă bri ưh hli luơ̆t, kơplăh ‘nŏh lơ tơ ‘ngla bri hŭt hơchăng lê̆ tơdrong vei lăng bri, đei tơ ‘ngla bri ưh kĕ vei lăng bri, lơ tơring tơ̆ Đắk Lắk bri ‘long vă hiong pơgŏh đĭ.