Jĭ mĭnh lơ̆m 5 pang mơ̆t tơblăh pơm rơngei Sài Gòn, Quân đoàn 3 hăm tơdrong jang iŏk pơjei Cham gre păr Tân Sơn Nhất păng Hơnih tơm chĕp pơgơ̆r ayăt. Vă iŏk pơjei đei dôm hơnih gĭt kăl au ƀlep lơ̆m năr 30/4 gĭt kăl, Quân đoàn hlôi đei trong iung tơblăh tôch gơ̆h hơgei, tĕnh koăng păng kơtang.

Trung tướng Nguyễn Quốc Thước, lơ̆m mă noh sơ̆ Kơdră chĕp pơgơ̆r Quân đoàn 3, bơngai chĕp kơ̆l mĭnh pang iung tơblăh tơdrŭt mơ̆t lơ̆m Sài Gòn tơroi tơbăt găh chăl sơnăm ưh kơ lai yơ hiơt lơ̆m năr rơngei: “Cham gre păr Tân Sơn Nhất păng Hơnih tơm chĕp pơgơ̆r hlôi đei rơngei hiôk hian lơ̆m 11jơ 30 pơnĭt. Lơ loh đơ̆ng 11 jơ truh 11 jơ 30 pơnĭt pơ đĭ 5 pang trong iung tơblăh mơ̆t lơ̆m Sài Gòn jei đei rơngei  hrơ̆p mĭnh ‘măng. Jơhngơ̆m đon hưch hanh hloh, lăp đơ̆ng rŏng iŏk đei dinh độc lập, đei rơngei bơih ‘noh pơm ăn kơ nhôn jĭ tôch kơ hưch hanh hơmanh bơnê, mă lei đei mĭnh tơdrong, ưh kơ đei Ƀok Hô. Lơ̆m mă nhôn pơkăp gô tơblăh pơrăm kĕ ayăt Mi, Ƀok Hô đĭ jĭ ăl, Ƀok tơroi: Rim ‘nhŏng oh bơ̆n hơdrin pơm rơngei hrôih Sài Gòn vă ĭnh đei năm ngôi hăm mih ma duch nă kon pơlei tơring Pơbăh ‘nhŏng oh hơ ... Pơgê đơ̆ng rŏng lơ̆m Radiô Nơ̆r Pơma Việt Nam rapor ƀai hơri đơ̆ng bơngai chih pơcheh Phạm Tuyên “Như có Bác Hồ trong ngày vui đại thắng”, lơ̆m mă noh nhôn mă hiôk chơt, Ƀok Hô hlôi năm tơ̆ au bơih, kon pơlei tơring găh Tu ‘moi kiơ̆ bơngai chih pơcheh tơdrong hơri hlôi sơng Ƀok năm truh hăm nhôn bơih, kơna lơ̆m mă noh sơ̆ ba ƀôh jơhngơ̆m đon ba tôch kơ hiôk hian”.

Vă jê̆ 50 sơnăm bơih jô̆ đơ̆ng năr đei jơnei tơring pơbah, rơngei teh đak, mă lei dôm tơdrong tơƀlŏk kơ năr khul linh tơdrŭt mơ̆t tơblah jơnei Sài Gòn adoi oei ‘nao lơ̆m đon bơnôh kơ dôm bơngai bơ̆ng pang kơtă. Pơ-ư pơ-ang lơ̆m grŭp bơngai chih ƀăo Việt Nam mă blŭng đei măt tơ̆ Dinh Độc lập truh ah ‘năr dơ̆ng năr  30/04/1975, bơngai chih ƀăo tơ̆ kơdrăn tơblah Trần Mai Hưởng, sơ̆ jang Kơdră dơnơm Thông tấn xã Việt Nam hlôi chŭp đei um rŭp kơ tơdrong đei jơnei hăm hơnăn: “Gre nar khul linh đei jơnei mơ̆t tơ̆ Dinh Độc Lập ah ‘năr dơ̆ng năr 30/4/1975" păng lơ hla bar ƀăo chih tơroi kơ năr đei jơnei nuih mơ̆ng noh. Bơngai chih ƀăo Trần Mai Hưởng ăn tơbăt, ah gre com măng ca chơ khul bơngai chih ƀăo mơ̆t tơjê̆ pơlei tơm noh ‘mrơ̆m phao đơ̆ng khul ayăt pơtoi tơjruh, gre chơ dôm bơngai chih ƀăo hơnơ̆ng yak hadoi tơjê̆ hăm gre nar vă hoai kơ ƀơm mrơ̆m phao.

Mă lei truh tơ̆ pơlei tơm noh ƀôh um rŭp cham char phara, kon pơlei chơt hơ-iă lĕch tơ̆ trong sơng khul linh đei jơnei truh: “Kon pơlei chơt hơ-iă, asong tơmam păng ‘nhăk đak nhă ăn ‘nhŏng oh. Minh ‘nu hơ-ioh 13-14 sơnăm kiơ̆ hao gre kơ bơngai chih kơtơ̆ng ang, sư hao lơ̆m gre păng jrơu nơ̆r: yaih phŏng bơih, yaih phŏng bơih. Oei kon pơlei ah 2 pah trong rôp kuăr ƀô đô̆i, rôp ti chơt hơ-iă păng hơri dôm ƀai hơri nhen ƀai Tiến về Hà Nội đơ̆ng Văn Cao pơcheh đei nơ̆r: “Lang lap khul linh yak nhen rơnglă đak, rim khul linh yak gah.” Nơ̆r hơri noh trŏ hăm khei năr noh. Rim bơngai hơri ƀai mă noh păng sô̆ hơ-iă tơƀôh trong ăn kơ nhôn nơnăm”