‘Năr 2/5, Tổng Thư ký Quốc hội hlôi tơlĕch Roi tơbăt nơ̆r tơgop đơ̆ng Anih chĕp kơ̆l pơgơ̆r Quốc hội găh tơdrong klăih song vei lăng tơdrong jang đơ̆ng Anih chĕp kơ̆l pơgơ̆r Quốc hội păng Quốc hội. Kiơ̆ kơ ‘noh, Anih chĕp kơ̆l pơgơ̆r Quốc hội klăih song jang ăn kơ ƀok Trần Thanh Mẫn, Bơngai jang lơ̆m Anih tơm Chĭnh trĭ, Phŏ Kơdră chĕp kơ̆l pơgơ̆r Quốc hội vei lăng tơdrong jang kơ Anih chĕp kơ̆l pơgơ̆r Quốc hội păng Quốc hội. Hơdrol ‘noh, đơ̆ng rŏng kơ mơ̆ng tơroi tơbăt dôm Hla ar tơroi, nơ̆r tơgop pơma dơnuh đơ̆ng ƀok Vương Đình Huệ, Quốc hội hlôi pơgơ̆r pơma dơnuh, tăh kơ phiê̆u hrĕp păng pơdrơ̆ng kiơ̆ tơdrong tơchơ̆t ăn pơdơh kơ pơm Kơdră Quốc hội, Bơngai jang lơ̆m Jơnŭm khŭl lĭnh păng vei sơđơ̆ng, ăn pơdơh kơ jang pơm bơngai tang măt Quốc hội hăm ƀok Vương Đình Huệ.

Ƀok Trần Thanh Mẫn rơneh sơnăm 1962, tơ̆ apŭng Châu Thành, dêh char Hậu Giang, hlôi đei jang lơ kơchư̆k jang nhen: Phŏ Kơdră, Kơdră Anih vei lăng kon pơlei, Bí thư Anih jang Đảng pơlei tơm Cần Thơ, Phŏ Kơdră, đang kơ ‘noh Kơdră Anih jang Trung ương MTTQ Việt Nam. Khei 4/2021, ƀok Trần Thanh Mẫn đei Quốc hội jăl XIV pôk pơm Phŏ Kơdră Quốc hội.