‘Năr 25/4, dêh char Bình Dương pơm lêh roi tơbăt Tơdrong tơchơ̆t đơ̆ng Anih chĕp kơl pơgơ̆r Quốc hội găh tơdrong pơjing phường An Điền, phường An Tây găh thĭ xăh Bến Cát păng pơjing plt Bến Cát. Vang truh pơm lêh đei Phŏ Kơdră Quốc hội Trần Quang Phương. Phường An Điền, An Tây đei pơjing ‘moi kiơ̆ đĭ đăng teh kơ 2 xăh đei hơnăn lei lăi kơpal. Plt Bến Cát đơ̆ng rŏng kơ pơjing đei 7 phường păng 1 xăh. Khei ‘năr âu ki, Bến Cát hơtŏk tơdrong jang hăm kơmăy kơmŏk, truh dang ei lơ̆m plt đei 8 tơring jang kơmăy, 1 tơring choh jang xa 1 ƀôt, chă tơdrong jang ăn 180.000 ‘nu bơngai jang. Dôm tơring jang kơmăy sơng đei 6.441 tơdrong tơmât jên jang, lơ̆m nŏh đei hloi tơdrong jang đei jên jang đơ̆ng teh đak đe, hăm 816 tơdrong jang, akŏm đĭ đăng đei kĭ pơkăp vă tơmât jang vă jê̆ truh 9,8 ti USD.

Pơma tơ̆ jơ pơm lêh, Phŏ Kơdră Quốc hội Trần Quang Phương ăn tơbăt, tơdrong pơjing plt Bến Cát jĭ tơdrong tôch gĭt kăl, tơbăt 1 hơyak tŏk pran ‘nao đơ̆ng tơring. Phŏ Kơdră Quốc hội Trần Quang Phương athei kơdră chĕp kơ̆l plt Bến Cát hơnơ̆ng tưk tơiung jơhngâm pran kơdih păng iŏk yoa dôm tơdrong ‘lơ̆ng đơ̆ng tơring vă jang atŏk tơiung mŭk drăm, tơpôl roi đei yoa hlŏh dơ̆ng. Thoi noh, jô̆ truh dang ei, Bình Dương đei 5 plt đei: Bến Cát, Tân Uyên, Thuận An, Dĩ An, Thủ Dầu Một. ‘Nâu jĭ dêh char đei plt lơ hlŏh lơ̆m teh đak bơ̆n.