Tơ̆ Hop akŏm, dôm bơngai tang măt hlôi pơma dơnuh păng vang dăr hơlen dôm tơdrong jang, hơnăp jang hơdrol tơlĕch jang kiơ̆ proh hơmet, hơlen lăng mơmat tat, long nol, tơhlăk tơhlĭn vă băt hơdăh trong vă jang, trong jang hơmet ming, tơlĕch jang đei yua tơdrong Proh hơmet tơring Hơlĕch Pơbăh hăm tơdrong tơm hơnhăk mŭk drăm tơpôl tơring Hơlĕch Pơbăh hơnơ̆ng hơtŏk tơiung hrĕnh, tôm tơdrong, ‘lơ̆ng păng kơjăp.

Đơ̆ng rŏng kơ mơ̆ng dôm nơ̆r tơgop pơma dơnuh, pơtôch hop akŏm, Thủ tướng Phạm Minh Chính pơma hơdăh, tơdrong jang pơkeh kĭ ăn proh hơmet tơring Hơlĕch Pơbăh lơ̆m khei ‘năr âu đei tơdrong ‘lơ̆ng gĭt kăl vă pơm hơdăh trĕng lăng, đon tơchĕng, tơdrong hơgăt tơ̆ Tơchơ̆r hơtŏk tơiung tơring păng proh hơmet kơ teh đak lơ̆m tơring; pơm hơdăh tơdrong hơmet ăn hơnih hơtŏk tơiung dôm tơdrong jang teh đak lơ̆m tơring; tơlĕch jang dôm tơdrong jang đei tơgoăt gĭt kăl đơ̆ng dôm dêh char lơ̆m tơring, jang hơdai tơring păng lơ tơdrong jang; tŭn pran bơ̆jang kiơ̆ dôm tơdrong ‘lơ̆ng gĭt kăl vă hơtŏk tôch ai đei yua pơting băl găh hơnih teh mŭk drăm kơ tơring, pơtrŭt hơtŏk tơiung mŭk drăm tơpôl kơ pơđĭ tơring păng dôm tơring tơjê̆.