‘Mi tih blŭng pơyan lơ̆m drơ̆m kơsơ̆ ‘năr 3/5 lơ̆m dêh char Kon Tum kŭm pơm pơhiôk jơhngơ̆m ăn dôm tơ ‘ngla bri ƀơ̆t mă kơhrĕng rơbâu hek tar bri tơ̆ dôm apŭng: Sa Thầy, Ia H’Drai, Đăk Tô, Ngọc Hồi, Kon Rẫy, Đăk Glei, pơlei tơm Kon Tum tŏk bŏk đei tơroi tơbăt lê̆ hơdrol ŭnh sa bri tôch kơ krê hơmơt gô đei ƀôh ŭnh sa tih, sa mơmrok hrĕnh. Ƀok Nguyễn Văn Huy, Kơdră vei lăng Anih hơlen lăng găh hơyuh tŏ ‘mi kial dêh char Kon Tum tơbăt: ‘Nâu jĭ ‘mi tih blŭng pơyan.

Đak ‘mi tơ̆ dôm apŭng: Đăk Hà, Sa Thầy, Đăk Tô, Kon Plông păng Đăk Glei đei đơ̆ng 50-70mm. Dôm apŭng uơ oei dơ̆ng lơ̆m dêh char đak ‘mi kŭm đei đơ̆ng 20-40mm. Hăm đak ‘mi thoi noh, ‘long pơtăm tơ̆ dêh char đei măh đak vă bluh jing ‘lơ̆ng đơ̆ng 5-7 năr.

Kơsơ̆ păng drâm kơsơ̆ 3/5, tơ̆ pơlei tơm Pleiku (Gia Lai) păng dôm apŭng jŭm dăr đei ‘mi tih, đunh hlŏh 1 jơ. ‘Nâu đei pơtih nhen thoi ‘mi “măih” yoa dŏng đei ‘long pơtăm tơ̆ lơ tơring lơ̆m dêh char. ‘Mi jruh blŭng tơ̆ Pleiku păng 1,2 xăh tơ̆ dôm apŭng jŭm dăr nhen Chư Păh, Ia Grai păng Đak Đoa, Chư Prông, dêh char Gia Lai đunh hlŏh 1 jơ. 

‘Mi jur tih mơ̆n, pơm rơngơp hơyuih kial tŏ hang đunh năr âu ki. Atŭm hăm ‘nŏh pruih rơngơp ăn kơhrĕng ha chĕh phe păng ‘long pơtăm nai oei phang pơđang, vă jô kro. Kiơ̆ Anih hơlen năng hơyuh plenh teh tơring Tây Nguyên, lơ̆m dôm năr truh, tơ̆ Gia Lai gô đei dơ̆ng ‘mi grâm tơ̆ lơ tơring. Tơdrong ‘nâu gô pơm pơhach đĭ ‘năr tŏ hang kơnê̆ lơ̆m dêh char. Mă lei, yoa tŏ phang đunh, kơna gô đei hơyuh ‘mi kial kơnê̆ nhen ‘mi prel, kial phŭt pơm ưh ‘lơ̆ng hăm ‘long pơtăm. Yoa thoi nŏh, kon pơlei athei kơchăng chă trong tơjră.