Sơng iŏk nơ̆r krao hơvơn đơ̆ng Khul kơdră teh đak Cuba, Phó Thủ tướng Trần Lưu Quang pơtơm năm hơpong tơ̆ Cuba đơ̆ng ‘năr 14-19/4. Kơsơ̆ ‘năr 15/4, Phó Thủ tướng Trần Lưu Quang đei jơ pơma đam hăm Phó Thủ tướng mă mônh pơm hloi Kơdră tơm vei lăng tĕch mơdro păng tơmât jên jang hăm teh đak đe kơ Cuba Ricardo Cabrisas. Tang măt ăn Khul kơdră teh đak păng kon pơlei Việt Nam, Phó Thủ tướng tơƀôh đon bơnê tôch pơnĕh hăm tơdrong tơgŭm đĭ jơhngâm đơ̆ng Kơdră chĕp kơ̆l Fidel Castro, rim jơhnơr chep kơ̆l păng kon pơlei Cuba ‘măn ăn Việt Nam lơ̆m tơdrong tơblăh iŏk rơngei hơdrĕch hơdrung, pơjing păng vei lăng teh đak.

Phó Thủ tướng pơma hơdăh, Khul kơdră teh đak Việt Nam adrin tơlĕch jang ‘lơ̆ng dôm tơdrong tơgŭm ăn Cuba hơtŏk tơdrong choh jang xa kiơ̆ jơhngâm đon đơ̆ng boăl juăt, ‘nhŏng oh, đei yoa tơ̆ yăn âu. Atŭm hăm ‘nŏh pơma hơdăh tơdrong gĭt kăl đơ̆ng anih tĕch mơdro păng kon pơlei 2 teh đak mưh tơlĕch jang, tưk tơiung tơdrong đei yoa đơ̆ng dôm tơdrong jang hơdoi 2 pang; athei Khul kơdră teh đak Cuba tơgŭm, pơjing tơdrong ‘lơ̆ng vă anih tĕch mơdro Việt Nam tơmât jên jang xa đei yoa ‘lơ̆ng tơ̆ Cuba. 2 Phó Thủ tướng drơ̆ng nơ̆r hơnơ̆ng jang hơdoi mă kơjăp lơ̆m tơdrong bơ̆ jang kiơ̆ dôm tơdrong drơ̆ng nơ̆r đơ̆ng kơdră chĕp kơ̆l, tưk tơiung hlŏh dơ̆ng tơdrong đei yoa đơ̆ng trong jang găh Anih jang hơdoi kơ 2 khul kơdră teh đak vă hơtgŏk dôm tơdrong jang hơdoi tơm, tơchă trong vă tơgŭm ăn anih tĕch mơdro Việt Nam truh tơmât jên, jang xa tơ̆ Cuba, tơgop ‘lơ̆ng ăn tơdrong pơvei 2 pang.