Ƀlep ƀât 1 jơ kơsơ̆, Lêh pơdong Tổng Bí thư Nguyễn Phú Trọng đei pơgơ̆r tih tơ̆ Hnam pơdong kơ teh đak kơsô̆ 5 Trần Thánh Tông, Hà Nội. Đơ̆ng rŏng nhak Quốc ca teh đak Việt Nam đei pơih, Kơdră teh đak Tô Lâm tang măt ăn kơdră chĕp kơ̆l Đảng, Teh đak Pơre nơ̆r ƀlŏk hơdơ̆r kơ Tổng Bí Nguyễn Phú Trọng.

Kơdră teh đak Tô Lâm tơroi dơ̆ng dôm tơdrong lơ̆m chăl arih păng bơ̆ jang kăch mang đơ̆ng Tổng Bí thư Nguyễn Phú Trọng, pơma hơdăh, vă jê̆ 60 sơnăm bơ̆ jang kăch mang tôch rơgei, kơjăp đunh, Giáo sư, Tiến sĩ, Tổng Bí thư Nguyễn Phú Trọng hăm đon gơ̆h hơgei hlôi ‘măn ăn đĭ đăng Đảng, đĭ đăng kon pơlei, đĭ đăng khul linh bơ̆n đon tơchĕng păng tơdrong tơblang tôch kăp gĭt găh trong jang kăch mang Việt Nam lơ̆m chăl ‘nao.

Hơnơ̆ng chĕp vei, tơmât yoa tôch rơgei chủ nghĩa Mác - Lênin, đon tơchĕng đơ̆ng Ƀok Hô, hăm đon pơhnŏng hơnhăk tơdrong rơngei ăn hơdrĕch hơdrung păng chủ nghĩa xã hội, bơngai đei đon tơchĕng trŏ ƀlep Nguyễn Phú Trọng, jĭ bơngai dơ̆ng hơdrol găh tơdrong tơblang hơdăh kơ Đảng hlôi tơƀôh hơdăh tơdrong trŏ ƀlep găh chủ nghĩa xã hội păng trong jang tŏk kiơ̆ chủ nghĩa xã hội tơ̆ Việt Nam, găh hơnăp jang đơ̆ng Đảng Cộng sản, găh mŭk drăm,tĕch mơdro hiôk hian kiơ̆ trong xã hội chủ nghĩa...

Tơmam tôch kăp gĭt ‘nŏh hlôi hơmet kơjăp đon lui găh trong jang tŏk chủ nghĩa xã hội, tơgop gĭt kăl ăn tơdrong jang tŏk đơ̆ng khul cộng sản lơ̆m apŭng plenh teh, tưk tơiung chủ nghĩa Mác - Lênin, đon tơchĕng đơ̆ng Ƀok Hô lơ̆m chăl ‘nao hrei ‘nâu. Kơdră teh đak pơma hơdăh: Apinh hơchăng ih bơih Tổng bí thư, đĭ đăng Đảng, đĭ đăng kon pơlei, đĭ đăng khul linh mĭnh jơhngâm khŏm bơ̆ jang kiơ̆ tơdrong hơpơi ‘mĕh đơ̆ng ih, đĭ jơhngâm pơvih ăn teh đak, pơvih ăn kon pơlei, bơ̆ jang đei đon pơhnŏng pơjing teh đak Việt Nam rơngei hiôk hian, kơjăp ‘lơ̆ng, kon pơlei pơm tơm, pơdrŏng ‘lơ̆ng rŏ, gơh hơgei păng hiôk chơt.

Ƀlep 1 jơ kơ sơ̆, lêh năm ƀŭ đei pơgơ̆r. Kơdră teh đak Tô Lâm, Thủ tướng Phạm Minh Chính, Kơdră Quốc hội Trần Thanh Mẫn, Chĕp kơ̆l pơgơ̆r Ban Bí thư Lương Cường kŭm hăm kơdră chĕp kơ̆l, sơ̆ pơm kơdră chĕp kơ̆l Đảng teh đak, kơdră chĕp kơ̆l dôm teh đak hlôi năm hơdai hơkâu Tổng Bí thư Nguyễn Phú Trọng, ƀa ƀok vih hăm yă ƀok tơ̆ pơsat Mai Dịch, Hà Nội. 

Ƀlep 3 jơ kơsơ̆ ‘nâu Lêh ƀŭ Tổng Bí thư Nguyễn Phú Trọng đei pơgơ̆r tih tơ̆ Pơsat Mai Dịch, Hà Nội. Lơ̆m jơhngơ̆m đon ‘mêm hmach tôch kơ dêh, tang măt Khŭl pơgơ̆r pơdong jơ̆p lơ̆m teh đak păng ŭnh hnam ƀok Tổng Bí thư Nguyễn Phú Trọng, ƀok Lương Cường, Bơngai jang lơ̆m Anih tơm Chĭnh trĭ, Chĕp kơ̆l pơgơ̆r Ban Bí thư, Kơdră Khŭl pơgơ̆r hơpong pơdong ƀŭ jơ̆p lơ̆m teh đak hlôi iung pơma bơnê truh rim bơngai tang măt păng kon pơlei:

“Tang măt Khŭl pơgơ̆r hơpong pơdong ƀŭ păng ŭnh hnam ƀok Nguyễn Phú Trọng, ĭnh apĭnh bơnê kơ rim kơdră chĕp kơ̆l, sơ̆ pơm kơdră chĕp kơ̆l Đảng, teh đak, Mặt trận Tổ quốc Việt Nam; rim bơngai tang măt kăp gĭt păng kon pơlei, rim bơngai lơ̆m teh đak, rim anih jang khŭl lĭnh, rim bơngai hơgei, hŏk jrŭ, bơngai pơgơ̆r lui khop, rim khŭl jang tơbôl, bơngai tang măt rim anih jang apŭng plĕnh teh hlôi năm hơpong, gơih kơvang pơkao, krao điên thoăi vang sơ ‘ngon, vang truh pơm Lêh hơpong pơdong ƀŭ păng ƀa ƀok Nguyễn Phú Trọng, Tổng Bí thư Khŭl chĕp kơ̆l pơgơ̆r Trung ương Đảng Cộng sản Việt Nam vih tơ̆ hơnih pơdơh tuch luch.”