Tơ̆ Kon Tum Tơdrong Et soi kơ ƀok Pơtao Hùng đei Khul pơgơ̆r vei lăng Hnam soi Lương Khế păng Khul kơdră pơgơ̆r phường Thống Nhất, plt Kon Tum pơgơ̆r tih, tôch ‘lơ̆ng. Kon pơlei, tơmoi chă tơmang lăng păng bơngai dơ̆ng tang ăn Khul kơdră pơgơ̆r tơring năm truh tơ̆ Hnam soi tôch lơ, soi kơ kŭh kơ yă ƀok Tơm dơnơm, apinh hơpơi ăn kon pơlei rơnuk rơnoa hiôk chơt, ‘năr rŏ tŏ hơlăng, jang xa đei ƀôh. 

Tơ̆ Gia Lai, Khul bơngai đơ̆ng Vĩnh Phú (dang ei ‘nŏh jĭ 2 dêh char Vĩnh Phúc păng Phú Thọ) arih xa tơ̆ dôm apŭng, thĭ xăh, plt lơ̆m dêh char Gia Lai truh akŏm tơ̆ Hnam soi kơ Ƀok Pơtao Hùng tơ̆ xăh An Phú, plt Pleiku, sŏh plang nhang, ƀlŏk hơdơ̆r kơ yă ƀok tơm a sơ̆. Tơ̆ Anih gru groa so Hnam soi Lạc Giao, plt Buôn Ma Thuột, khul kơdră pơgơ̆r păng kon pơlei lơ̆m dêh char Đắk Lắk pơgơ̆r tih lêh Et soi kơ ƀok Pơtao Hùng vă tơƀôh jơhngâm đon ‘mêm bơnê kơ đe Ƀok Pơtao Hùng đei kŏng pơjing teh đak.

Tơ̆ Lâm Đồng, Lêh Et soi kơ Ƀok pơtao Hùng pơgơ̆r ‘lơ̆ng hơiă, hăm dôm tơdrong soi tơm đei: Sơng tơmam plang pơyơ̆r kơ Ƀok yă Tơm dơnơm kơ teh đak, Lêh pơyơ̆r so păng sŏh plang nhang ăn ƀok yă Tơm dơnơm tơ̆ dôm Hnam soi Kơtu, Tŏk bŏk păng Pơbăh găh Hnam soi yă Âu Lạc lơ̆m Anih chă tơmang lăng Chơkơi Prenn Đà Lạt.

‘Nâu jĭ jơnăr vă kon pơlei dôm hơdrĕch hơdrung Tây Nguyên hue lăng truh tơ̆ yă ƀok Tơm dơnơm sơ̆, tơƀôh jơhngâm đon kŭp yom, ƀlŏk hơdơ̆r truh kŏng tih tên đơ̆ng đe Ƀok Pơtao Hùng hlôi pơjing păng vei lăng teh đak, kiơ̆ đơ̆ng noh vang tơgop hơmet kơjăp păng tưk tơiung tơdrong tơguăt 1 ƀơ̆r đon, mât mĭnh jơhngâm ăn rim hơdrĕch hơdrung.