Tơring Đak Nia, pơlei tơm Gia Nghĩa, dêh char Dak Nông ‘noh jing tơring pơlei oei đunh hloh kơ kon pơlei bơngai M’Nông. Lơ̆m rim ‘măng tơblăh vang, kon pơlei ling lang tơklep kơjăp hăm kech mang, lui păng kiơ̆ Đảng. Tơring Dak Nia ‘noh jing tơring ƀôh hơdăh chăl sơnăm đunh đai tơ iung pơjing trong Hồ Chí Minh nuih mơng. Lơ̆m 4 jơ kơsơ̆ năr 30/10/1960, tơ̆ tơring Dak Nia, Đoàn B90 oei tơ̆ găh Tu păng Đoàn C200 oei tơ̆ găh Pơbăh hlôi gơ̆h chă goăt dih băl, tơƀưh ƀar kơdrăn tơblăh Tây Nguyên hăm Đông Nam Bộ, pơjing đei trong Hồ Chí Minh, sơđơ̆ng ăn chơ pơdŭ tơgŭm djru đơ̆ng tơring Tu ăn kơdrăn tơblăh tơring Pơbăh lơ̆m ‘măng iung tơblăh pơm rơngei tơring pơbăh, Teh đak rơngei keh kong. Hơnih mă ƀar Đoàn B90 hăm C200 tơƀơ̆p dih băl hrei au hlôi đei Kơdră chĕp pơgơ̆r Teh đak tơchơ̆t jing Hơnih gru gra gĭt kăl dăr sơnăm teh đak. Ƀok Ksrai, Kơdră chĕp pơgơ̆r măt trân Tổ quốc Việt Nam tơring Dak Nia, pơlei tơm Gia Nghĩa, dêh char Dak Nông pơma: “Lơ̆m rim ‘măng tơblăh vang, hăm kon pơlei kon kông kơtă tơ̆ au ling lang lui kiơ̆ Đảng. Dĭng truh dang ei, kon pơlei ling lang lui kiơ̆ trong bơ̆ jang đơ̆ng Đảng, Khôi luơ̆t Teh đak, ling lang tơgoăt tơgoăl pôm nơ̆r ƀơ̆r đon vă vei kơjăp rơngei hiôk hian hrei au păng ling lang  tơgoăt tơgoăl vă tơ iung pơjing mŭk drăm roi năr roi atŏk tơ iung, tơdrong hơrih sa roi phĭ tơtŏ dơnŏ ‘lơ̆ng dơ̆ng kơjăp, atŏk tơ iung vă kon pơlei pơdrŏng, teh đak pran kơtang. Rim jơhnơr mĕ ƀă yă ƀok sơ̆ lei ling lang pơtho khan ăn jơhnơr mơlôh găh tơdrong jăng joe kĕch mang nuih mơng pran kơtang.”

Lơ̆m tơdrong mă jơ̆p teh đak hăt hot tơbăt 49 sơnăm đei jơnei tơring pơbah,r ơngei teh đak, linh so Y Joan Niê (bơngai Ê đê) oei tơ̆ pơlei ALê A, phương Ea Tam, pơlei tơm Buôn Ma Thuột, dêh char Đăk Lăk vih tơƀlŏk gah tơdrong nuih mơng kơ hơdrung hơdrĕch.

Ƀok tơroi, khei năr noh ƀok oei ‘lơ̆p, đei ƀă chơng ba pŭ ‘nhăk tơmam xa, pơgang ăn khul ƀô đô̆i. Ƀok tơroi ƀơ̆t ‘măng tơƀơ̆p Khul linh yaih phŏng păng đang măt bơ̆ng pang tơdrong sô̆ hơ̆k teh đak đei rơngei: “Ah đei iŏk jơnei Buôn Ma Thuột đei jơnei Tơdrong tơblah Tây Nguyên noh ah blŭng khei 3/1975, khei năr noh inh dang 14 - 15 sơnăm hia. Ƀă inh hơnơ̆ng chơng ba pŭ pơgang, phe, ƀum, hơƀo, ‘nhĕm, ‘nhot truh dôm anih Khul linh yaih phŏng oei tơ̆ thĭ xah Buôn Ma Thuột so sơ̆ vă asong ăn ƀô đô̆i. Ƀô đô̆i khei năr noh tơnap kơlih ưh kơ mah tơmam xa, pơgang, lơ bơngai pơlŏ pơgrŭn, ‘noh ah đei kon pơlei asong ăn tơmam đe sư sô̆ hơ̆k dêh. Đe sư akhan, tơblah đei jơnei Tây Nguyên noh gô tơblah đei jơnei tơring pơbah. Pơhlom lơ̆m 2 giĕng đơ̆ng rŏng kơ ‘noh, dang ah năr 30/4, rim bơngai tơ̆ pơlei ALê A đei băt Khul linh yaih phŏng hlôi đei iŏk Dinh độc lập ah 10h45’, tơblah pơrơngei Sài Gòn”.