Pơma ah ‘măng tơƀơ̆p, Thủ tướng Phạm Minh Chính hlôi pơtruh nơ̆r apinh jet gia pơma dơnuh, nơ̆r thơ thâu ‘lơ̆ng hơ-iă hloh đơ̆ng ƀok Tổng Bí thư Nguyễn Phú Trọng truh hăm mih ma duch nă, pơmai oh linh Điện Biên, bơngai jang xung phong, kon pơlei kon kông tơ̆ dêh char Điện Biên hlôi tơgop kăp gĭt pơjing đei tơdrong jơnei kơ jơhnơr hơrih Điện Biên Phủ "nuih mơng ư ang jơ̆p 5 tơring, tơdrŏ jơ̆p plei teh".

Thủ tướng ăn tơbăt, dôm sơnăm kơ âu, hăm đon bơnôh "Nhă đak chăm kơ tu, xa plei ƀlŏk kơ bơngai pơtăm tơm", Đảng, Teh đak bơ̆n hơnơ̆ng tơrĕk kăp gĭt păng pơgơ̆r jang tơnăp tơdrong jang ƀlŏk bơnê hăm sơnong jang tơnăp păng hmach bơnê kăp gĭt: hlôi tơlĕch jang đei jơnei lơ trong tơlĕch jang vă tơgŭm hăm đe linh jĭ rơka, ‘nhŏng oh linh lôch tang ăn teh đak, dôm bơngai tơgŭm jơhngơ̆m ăn kăch mạng, lăng âu jing sơnong jang chĭnh trĭ kăp gĭt, hơnơ̆ng athei jang tơnăp.  Khei năr truh, Thủ tướng pơkăl dôm jăl jang, rim tơring pơtoi jang tơnăp tơchơ̆t đơ̆ng Đảng, khôi luơ̆t teh đak, hơtŏk pran hloh dơ̆ng tơdrong vei lăng linh jĭ rơka, unh hnam linh lôch tang, bơngai tơgŭm jơhngơ̆m ăn kăch mạng.