Tơ̆ Hnam soi Kính Thiên hăm jơhngơ̆m đon kŭp yom ƀlŏk hơdơ̆r kŏng jang đơ̆ng ƀok yă sơ̆, tơƀôh jơhngơ̆m đon “Nhă đak ƀlŏk kơtu” đơ̆ng hơdrĕch hơdrŭng Việt Nam, Thủ tướng Phạm Minh Chính kŭm hăm đe kơdră chĕp kơ̆l Đảng, teh đak păng kơdră chĕp kơ̆l tơring mơ̆t soh plang nhang, dan pơkao, tơƀôh jơhngơ̆m đon băt bơnê gĭt kăl kơ đe ƀok yă sơ̆ hlôi đei kŏng tơiung teh đak vă kon sâu pơtăl dơ̆ng tơdrong joăt joe Lạc Hồng pơjing teh đak Việt Nam pơdrŏng ‘lơ̆ng, hơgei nhen hrei ‘nâu.

Lơ̆m jơ pơnĭt kăp gĭt kơ năr et soi kơ ƀok pơtao Hùng, kơ triê̆u plei nuih bơngai Việt tơ̆ lơ̆m păng ‘ngoăih teh đak, vang hue lăng găh Đền Hùng hăm jơhngơ̆m đon kŭp yom vă ƀlŏk hơdơ̆r kơ kŏng jang đơ̆ng dôm ƀok pơtao Hùng, đe ƀok yă hơdrol sơ̆ hlôi đei kŏng tơiung teh đak păng vei teh đak. Lăp đơ̆ng rŏng kơ Lêh soh plang nhang,Thủ tướng Phạm Minh Chính păng dôm bơngai tang măt dan kơvang pơkao, soh nhang tơ̆ Pơsat Hùng Vương; pơyơ̆r pơkao tơ̆ Rup man Ƀok Hồ pơma dơnuh hăm kang ƀô̆, khŭl lĭnh Đại đoàn quân Tiên Phong tơ̆ hơnih 5 trong tơklăh kơ hnam soi Đền Giếng.