Hmach chơt hơiă kơ Bơngai tang măt Yamada Takio jang đang hơgei hloh khei ‘năr bơ̆jang tơ̆ Việt Nam, đei Kơdră teh đak tơchơ̆t hơpăh Mê đai Tơbôl, Thủ tướng Phạm Minh Chính lăng ‘lơ̆ng păng bơnê kơ dôm tơdrong ‘mêm, đĭ jơhngơ̆m păng hơdrin đơ̆ng Bơngai tang măt lơ̆m pơtrŭt tơdrong pơvei jang hơdai lơ tơdrong Việt Nam-Nhật Bản. 2 păh tơƀôh đon chơt hơiă lăng ƀôh lơ̆m khei ‘năr bơ̆jang tơ̆ Việt Nam đơ̆ng Bơngai tang măt, tơdrong pơvei Việt Nam-Nhật Bản hơtŏk tơiung pran kơtang, tôm tơdrong păng tơpă lơ̆m lơ tơdrong jang.

Tơdrong pơvei 2 teh đak ƀrư̆ ƀrư̆ jing tơƀôh hơiă ăn tơdrong jang hơdai đei yua, tơpăt, hăm tơmam ‘lơ̆ng păng hơmĕng đĭ jơhngơ̆m pơih să. Thủ tướng Phạm Minh Chính athei tơ̆ hơnăp kơnh, mă đơ̆ng lơ̆m kơchư̆k jang kiơ, Bơngai tang măt hơnơ̆ng hơtŏk hơnăp jang, tơgop lơ̆m tơdrong pơvei Việt-Nhật lơ̆m đĭ đăng dôm tơdrong jang.