Tơ̆ jơ tơƀơ̆p, Thủ tướng Phạm Minh Chính hlôi gơih nơ̆r bơnê gĭt kăl hloh truh Đảng, teh đak păng Kon pơlei Lào pơma atŭm kŭm nhen truh ƀok Tổng Bí thư, Kơdră teh đak Lào păng Hơkăn sư pơma hơdrô̆ găh dôm tơdrong ‘mêm tơpă, ƀĕnh tơdrong ‘mêm ‘nhŏng oh ‘măn ăn kơ Đảng, teh đak păng kon pơlei Việt Nam tơ̆ hơnăp tơdrong lôch hơchăng đơ̆ng Tổng Bí thư Nguyễn Phú Trọng; mă kăl ‘noh Lào hlôi pơgơ̆r Lêh pơdong jơ̆p lơ̆m teh đak 2 năr vă ƀlŏk hơdơ̆r Tổng Bí thư Nguyễn Phú Trọng, kiơ̆ đơ̆ng noh tơƀôh tơdrong pơvei gĭt kăl, 1 jơhngơ̆m đon kơjăp ‘lơ̆ng đơ̆ng 2 teh đak.

Thủ tướng teh đak pơma hơdăh, ƀơ̆t oei hơrih Tổng Bí thư Nguyễn Phú Trọng ling lang tôch kơ bơngơ̆t truh tơdrong vei răk, ưh kơ pơdơh hơmet ming păng hơtŏk tơiung tơdrong pơvei joăt joe gĭt kăl Việt Nam – Lào; bơnê kơ Hơkăn Tổng Bí thư, Kơdră teh đak Lào hlôi đei hla ar kơthơ tôch ƀrơ̆k jơhngơ̆m gơih kơ Hơkăn Tổng Bí thư Nguyễn Phú Trọng.