Iung pơma tơ̆ jơ pơm lêh, tang măt ăn Kơdră chĕp pơgơ̆r Đảng, Teh đak, Thủ tướng Phạm Minh Chính hôn bơnê kơtang dôm tơdrong bơ̆ jang jơnei tih tên kơ rim jơhnơr kang ƀô̆, kŏng ang khul Kanh sat Cơ động lơ̆m 50 sơnăm au ki.

Thủ tướng athei khul Kŏng ang kon pơlei pơma atŭm păng khul Kanh sat Cơ động pơma hơdrô̆, mă đơ̆ng lơ̆m khei năr ayơ jei tơlĕch jang kơtang, sơđơ̆ng ăn tơdrong chĕp pơgơ̆r kơtang, iung jang rim tơdrong kơ Đảng mă bơngai chĕp kơ̆l ‘noh Tổng Bí thư Nguyễn Phú Trọng, tơdrong chĕp pơgơ̆r đơng Kơdră chĕp pơgơ̆r teh đak, trong chĕp pơgơ̆r vei lăng teh đak đơ̆ng Khul kơdră Teh đak, Thủ tướng teh đak; tơdrong chĕp kơ̆l, vei lăng kơtă đơ̆ng Kơdră chĕp pơgơ̆r Hơnih tơm Kŏng ang. Kăl tơpă lăng kơjăp bơ̆ jang tơ iung pơjing Đảng; pơm hơtŏk jơhngơ̆m đon chĕp pơgơ̆r, kơrŭn đĭ jơhngơ̆m iung jang jră tang găn đơ̆ng khul đảng, đảng viên; hơdrin đĭ ai tơ iung pơjing khul Kanh sat Cơ động tơpă rơgoh ‘lơ̆ng, pran kơtang, gơ̆h hơgei, hơbech hơbal pran kơtang yak mơ̆t lơ̆m bơ̆ jang gơ̆h hơgei, pran kơtang kiơ̆ chăl hle.