Vă jê̆ 500 ‘nu bơngai tang măt vang truh akŏm ‘măng pơgơ̆r pơih blŭng, hăm tơdrong đei măt đơ̆ng Thủ tướng teh đak Cộng hoà Dân chủ Nhân dân Lào - Kơdră ASEAN 2024; ƀok Kao Kim Hourn, Tổng Thư ký ASEAN; dôm kơdră tơm, kơdră tang măt, bơngai tang măt Khŭl kơdră teh đak dôm teh đak ASEAN, dôm teh đak jang hơdai pơma dơnuh, dôm anih jang apŭng plĕnh teh. Hop akŏm Khei ‘năr tơ̆ hơnăp kơnh kơ ASEAN 2024 hăm hơnăn “Pơjing Tơpôl ASEAN hơtŏk tơiung hrĕnh, kơjăp, iŏk kon pơlei pơm tơm” jĭ 1 tơdrong pơcheh gĭt kăl yua đơ̆ng Thủ tướng Phạm Minh Chính tơlĕch tơ̆ Hop akŏm kơdră kơpal ASEAN ‘măng mă 43 lơ̆m khei 9/2023.

‘Nâu jĭ đon tơchĕng ‘nao đơ̆ng Việt Nam hăm ‘meh vă pơm hop akŏm atŭm ăn dôm teh đak jang lơ̆m ASEAN kŭm nhen đe bôl buăl jang hơdai kơ ASEAN, kon pơlei ASEAN vang tơgop lơ̆m tơdrong pơtrŭt, hơmet ‘lơ̆ng jăl trong hơtok tơiung ăn khei ‘năr tơ̆ hơnăp kơ ASEAN. Iung pơma tơ̆ hop akŏm, Thủ tướng Phạm Minh Chính pơma hơdăh, vă bơ̆jang kiơ̆ ‘lơ̆ng Trĕng lăng ASEAN 2045, kăl kơ bơ̆jang kiơ̆ 5 hơtŏk loi dơ̆ng păng Việt Nam gô hơnơ̆ng hơdrin hloh dơ̆ng vă tơgŭm chih dơ̆ng dôm tơdrong tơroi jơnei, pơih ăn khei ‘năr tơ̆ hơnăp kơnh drơ̆ng 1 nơ̆r lơ̆m lơ tơdrong kơ ASEAN.