Tơ̆ ‘măng tơƀơ̆p, 2 Thủ tướng drơ̆ng nơ̆r sơkơ̆t tơdrong tơbôl kăp gĭt, tơguăt tơguăl păng jang hadoi tôm tơdrong Việt Nam – Lào pơtoi hơtŏk tơ-iung ‘lơ̆ng, kơjăp păng đei jơnei lơ̆m tôm tơdrong jang lơ̆m khei năr âu ki. Jang hadoi gah mŭk drăm, tĕch pơdro, asong jang pơtoi đei hơtŏk pran păng đei lơ tơdrong tơplih. Tĕch pơdro kơ 2 teh đak lơ̆m jăl 1 sơnăm 2024 đei yua 476,8 trĭu đôlar, tŏk 12% pơtêng hăm khei năr âu sơnăm 2023. Jang hadoi lơ̆m dôm tơdrong jang nai nhen pơtho pơhrăm, joh ayŏ, khua hŏk kih thuơ̆t, tơmang pơhiơ̆ păng akŏm kon pơlei... pơtoi hơtŏk pran kiơ̆ rok hơtŏk jang đei jơnei tơnăp.

Ƀơ̆t ‘măng âu, 2 Thủ tướng hlôi atŭm băl pơma đam gah dôm trong jang hơdah vă tơlĕch jang đei jơnei dôm tơchơ̆t pơdrơ̆ng kơpal kơ ‘Măng hop akŏm 46 Anih jang hadoi Jơnŭm pơgơ̆r teh đak Việt Nam – Lào. Ƀar pah drơ̆ng nơ̆r hơtŏk tơroh 2 teh đak jang mŭk drăm, mă hăt noh gah trong jang jên hu, trong nơnăm, unh hơyuh, jang viễn thông, tơmang pơhiơ̆; tơgŭm dih băl pơjing tơdrong jang mŭk drăm hiôk hian, tơguăt hăm tơchơ̆t jang hadoi lơ̆m kơpal teh păng tơpă jang đei jơnei.

Ƀar Thủ tướng drơ̆ng nơ̆r jang hadoi kơjăp, tơgŭm dih băl lơ̆m dôm tơdrong hop akŏm lơ̆m tơring păng lơ̆m apŭng plenh teh nhen ASEAN, Liên hơp kuôk păng dôm tơchơ̆t jang tơring đak krong Mê Công. Thủ tướng Phạm Minh Chính sơkơ̆t hơdah, Việt Nam pơtoi tơgŭm teh đak Lào vei sơđơ̆ng đei jơnei sơnong jang apŭng plenh teh lơ̆m sơnăm 2024, lơ̆m noh đei sơnong jang kơdră ASEAN.