Tơ̆ hop akŏm, dôm bơngai juăt jang, bơngai jang khoa hŏk, bơngai vei lăng, kŭm hăm kơdră chĕp kơ̆l dôm tơring chă hơlen năng rim tơdrong tơ̆ yăn âu, roi tơƀôh dôm tơdrong kăl, tơlĕch lơ trong jang tôch rơđăh vă tơgop đon rơgei, tơlĕch đei trong jang ‘lơ̆ng vă atŏk tơiung dêh char Lâm Đồng (‘nao) hăm tơdrong tơm ‘nŏh: “Pơjing păng atŏk tơiung tôm tơdrong ăn dêh char Lâm Đồng, iŏk tơdrong sơđơ̆ng pơm tơm vă jang tŏk; iŏk tơdrong jang tŏk mŭk drăm pơm tơm; iŏk tơdrong hiôk chơt păng phĭ tơtŏ dơnŏ ‘lơ̆ng đơ̆ng kon pơlei vă pơm đon adrin; truh sơnăm 2030 dêh char Lâm Đồng jing dêh char đei ƀôh, đei iŏk yoa lơ păh lăp, lăp hăm trong tơlĕch jang vă atŏk tơiung teh đak”.

Kiơ̆ kiến trúc sư Trần Ngọc Chính, Kơdră Khul tơproh trong jang tŏk tơring kơdrâm Việt Nam, trong vă jang tŏk dêh char Lâm Đồng ‘nao athei pơm ‘lơ̆ng ăn 3 tơdrong ‘nŏh hrơ̆ch ‘lơ̆ng – kơjăp – tơguăt tơring, lơ̆m noh athei chih hơdăh tơdrong jang yơ kăl hlŏh: “Mưh đei tơmât hơdai bơ̆n athei hue lăng truh tơdrong jang mŭk drăm yơ kăl hlŏh. Mŭk drăm đak dơsĭ đơ̆ng Lâm Đồng ‘nao ‘nŏh jĭ tơdrong vă pơ ‘nhŏ jang hơdrol, đơ̆ng rŏng kơ ‘nŏh jĭ kơmăy kơmŏk ‘nao đơ̆ng tơring Đà Lạt, păng Đắk Nông ‘nŏh jĭ kơmăy sir iŏk bauxite. Thoi noh tơdrong tơguăt hơdai đơ̆ng 3 dêh char âu hăm tơdrong jang tŏk ‘nŏh gô ƀơm truh tơ̆ dôm tơring kơdrâm. Inh tơchĕng đei 3 tơring kơdrâm tơm kăl hlŏh ‘nŏh jĭ Đà Lạt, Gia Nghĩa păng Phan Thiết, rim tơring kơdrâm đei lơ tơring oei xa ‘lơ̆ng păng bơ̆n tơguăt sư vă jang tŏk”.

Hop akŏm pơma hơdăh, đơ̆ng rŏng kơ tơmât hơdai, Lâm Đồng ‘nao đei bri, đei đak dơsĭ, ‘măng jang sơlam, tơnok duk, jing “tơring pơtăm tơm” kơ 1,2 kơloăi ‘long kăp gĭt, ‘long xa plei păng kơmăy sir iŏk bauxite. ‘Nâu jĭ tơdrong ‘lơ̆ng tih, tôch kăp gĭt vă Lâm Đồng pơjing đei trong jang tŏk ‘nao, pran ‘lơ̆ng, ƀơm truh tơ̆ rim tơdrong, pơm ‘lơ̆ng ăn tơdrong jang tŏk pran păng tôm tơdrong, vang tơgop jang đei tơdrong jang tŏk truh 2 kơsô̆ đơ̆ng 2026 – 2030.

Kiơ̆ ƀok Trần Hồng Thái, Kơdră vei lăng kon pơlei dêh char Lâm Đồng, hop akŏm oei roi tơƀôh dôm tơdrong ‘lơ̆ng tam mă iŏk yoa ‘lơ̆ng, kŭm hăm dôm tơdrong tam mă pran oei găn trong jang tŏk, tơgŭm năng ƀôh hơdăh ƀiơ̆ um ai jang tŏk kơ dêh char Lâm Đồng ‘nao lơ̆m tơring teh ‘nao. ‘Nâu jĭ dôm nơ̆r tơgop tôch gĭt kăl vă Lâm Đồng pơjing đei tơdrong jang tơm lơ̆m Hla ar kăl vă tơroi ăn Hop akŏm Đảng ƀô̆ dêh char truh âu kơnh.

Ƀok Trần Hồng Thái, pơma hơdăh: “Atŏk tơiung mŭk drăm, tơpôl kơ Lâm Đồng athei tơklep hăm đon pơhnŏng jang tŏk rơgŏh ‘lơ̆ng, pran kơjăp păng tôm tơdrong ‘moi kiơ̆ tơdrong jang mŭk drăm rơgoh, mŭk drăm kơsô̆ păng tơplih ‘nao rơgei. Tơdrong jang tŏk ‘nŏh athei tơmât lơ̆m anih tơguăt hơdai lơ tơring, lơ pang. Tưk tơiung tơdrong pran ‘lơ̆ng đơ̆ng 1 dêh char đei hloi groi kông, tơring tơter đak dơsĭ, tơring sơlam, hơmet ming anih jang tŏk kiơ̆ trong tơmât hơdai đĭ đăng păng tơguăt ‘lơ̆ng rim anih jang mŭk drăm tơm. Jang tŏk tôm tơdrong păng iŏk kon bơngai pơm tơm ‘nŏh jĭ tơdrong kăl hlŏh, athei năng kon pơlei jĭ tơ ‘ngla tơm dơnơm, anih tĕch mơdro jĭ jơhngâm pran păng khul kơdră tơring jĭ anih pơjing tơdrong ‘lơ̆ng vă pơvih pơvăn. Inh athei Grŭp chih hơmet Hla ar kăl ăn Hop akŏm bơngai tang măt Đảng ƀô̆ dêh char Lâm Đồng ‘nao chih răk rim nơ̆r pơma đơ̆ng dôm bơngai juăt jang”.

‘Nao âu, tơ̆ jơ bơ̆ jang hăm 3 tơring adrol kơ pơjing dêh char Lâm Đồng ‘nao, Tổng Bí thư Tô Lâm đei nơ̆r pơtho tôch hdăh: “Lâm Đồng, Bình Thuận păng Đắk Nông jĭ dôm tơring đei ƀĕnh tơdrong juăt jang kăch mang, hăm lơ tơdrong jŏh ayŏ kơ dŏ xoang kơ hơdrĕch kon kông tôch ‘lơ̆ng, oei adrin jang tŏk, tơplih ‘nao tôm tơdrong păng tơƀôh hơdăh anih dơ̆ng roi đunh roi gĭt kăl lơ̆m tơdrong jang tŏk mŭk drăm – tơpôl tơ̆ tơring Tŏk bŏk - Tây Nguyên. Rim tơring đei kơdih tơdrong ‘lơ̆ng, tơdrong pran, vang pơjing đei anih jang tŏk tôch ‘lơ̆ng hơiă, lơ tơdrong.

Tổng Bí thư pơma dơ̆ng: “Jơhnơr arih oei pơjao ăn dêh char Lâm Đồng ‘nao lơ tơdrong ‘lơ̆ng rŏ, jơhngâm pran păng tơdrong hiôk hian đơ̆ng sơ̆ tam mă biơh đei vă jang tŏk, yoa thoi noh athei tơgĕch iŏk, đei trong jang trŏ ƀlep pơm ăn tơdrong ‘lơ̆ng, jơhngâm pran păng hiôk hian jing trong jang tŏk tôch hơdăh, vă pơm hơtŏk tơdrong arih xa ăn kon pơlei”./.