Truh hơpong păng asong tơmam kơ Hnam trưng Jăl kơđeh Bắc Sơn (dêh char Vân Nam, Trung Quốc) Ƀô̆ trương Phan Văn Giang păng Ƀô̆ trương Đổng Quân hơpơi ‘meh Hnam trưng pơtoi đei lơ tơdrong pơm jang vă hơtŏk jơhngơ̆m pơ-‘nam hŏk pơhrăm ăn đe hŏk tro hơpơi ‘meh plang pơm jang ăn teh đak păng jing bơngai bơ̆ng pang mơlôh pơdjoi tơdrong tơguăt tơguăl, tơbôl juăt jue kơ 2 teh đak Việt Nam - Trung Quốc.
Adoi lơ̆m ‘năr âu, ƀar ƀô̆ trương atŭm hăm khul kơpal tang măt ăn Anih tơm jang gah Khul linh kơ 2 teh đak hlôi truh tơmang thôn Bát Điều Bán. ‘Nâu jĭ thôn Jơnap sơlam teh jang kiơ̆ trong ‘nao, oei gah tơring hơlĕch tu kơ apŭng Hà Khẩu, tơring Hồng Hà, dêh char Vân Nam, Trung Quốc. Pơjao tơnô̆ tơmam ‘mêm kơ-eng ăn thôn Bát Điều Bán, ƀar Ƀô̆ trương hơpơi ‘meh roi năr thôn roi hơtŏk tơ-iung hloh dơ̆ng, đei lơ tơdrong akŏm pơma đam hăm Việt Nam, vă hơtŏk hlôh vao dih băl hloh, tơgop hơtŏk mŭk drăm tơ̆ tơring sơlam.
Viết bình luận