Tơ̆ công ty chơ choh hơbăn ao Lực Thiêm, găh Tơring jang kơmăy Tân An, plt Buôn Ma Thuột, jơhngâm đon bơ̆ jang đơ̆ng lơ khul grŭp tơ̆ âu tôch hơiă. Công nhân H’Ly Na Ayun tơroi, đơ̆ng blŭng sơnăm truh dang ei, công ty iŏk đei lơ hla ar apinh răt tơmam, jên khei tŏk, kơna pơm ăn jơhngâm đon bơ̆ jang tôch hưch hanh: “Công ty păng công đoàn vang vei lăng năng tông ‘lơ̆ng ăn bơngai jang nhen hơpăh thim 1 khei jên khei ăn bơngai jang păng hơpăh tơmam ăn dôm bơngai jang rơgei. Hơpơi ‘meh công ty jang tŏk pran hlŏh dơ̆ng vă gơ̆h đei jên khei roi lơ, đei iŏk yoa kơjăp ƀiơ̆”

Tơ̆ tơring jang kơmăy Hòa Phú, plt Buôn Ma Thuột, hloh 2.400 ‘nu công nhân oei pơjei băl bơ̆ jang ‘năi. Khei ‘năr âu ki, tơdrong pơjei băl tưk tơiung tơdrong pơchĕh, hơmet pơ ‘lơ̆ng ki thuơ̆t jang yoa khul công đoàn tơlĕch sơng đei lơ công nhân tơ̆ anih jang vang akŏm. Lơ tơdrong pơchĕh đei yoa hlôi hơmet pơ ‘lơ̆ng anih bơ̆ jang, ‘mơ ‘met đei tơmam păng pơm lăp hăm tơdrong tơplih ‘nao kơmăy kơmŏk jang xa. Nhen thoi 2 tơdrong chĕh ki thuơ̆t pơm jơ̆ng gơn hlôm ô xy ăn kơmăy pơm pơsei păng ƀôm pruih đak pơm rơngơp đơ̆ng công nhân Lê Trung Hiếu, vei lăng ki thuơ̆t điên – Kơmăy pơm pơsei găh Công ty jang hơdoi pơm pơsei ASEAN, tơgŭm ‘mơ ‘met đei bơngai jang, unh điên păng pơm tơjur ƀiơ̆ tơdrong krê pơ̆k rơka mưh bơ̆ jang.

‘Nhŏng Lê Trung Hiếu ăn tơbăt: “Mưh mât jang tơ̆ anih âu đei hŏk iŏk lơ tơdrong ‘nŏh ba jang roi gơ̆h. Kơlih đơ̆ng dôm tơdrong kăl đei chih răk ‘nŏh kơna pơm đei lơ tơmam pơchĕh ‘nao thoi âu. Mưh jang đei thoi âu inh ƀôh tôch hơiă, inh ƀôh ba tơgŭm đei ăn ‘nhŏng oh, bôl boăl bơ̆ jang hiôk hian, sơđơ̆ng ‘lơ̆ng ƀiơ̆”

Yă Lê Thị Tuyết Hạ, Kơdră vei lăng Công đoàn Công ty jang hơdoi pơm pơsei ASEAN ăn tơbăt, Công ty hơnơ̆ng pơngơ̆t pơjing tơdrong ‘lơ̆ng vă bơngai jang gơ̆h bơ̆ jang sơđơ̆ng ‘lơ̆ng păng pơjei băl bơ̆ jang: “Tơdrong jang tơ̆ hnam kơmăy ‘nŏh  jang kơmăy trăp athei bơ̆n hơnơ̆ng chă trong hơmet pơ ‘lơ̆ng. Hnam kơmăy hơnơ̆ng tơlĕch tơdrong hơgăt vă bơngai jang adrin, hơnơ̆ng đei trong jang bơ̆n jĭ 1 unh hnam kơna tơdrong đei yoa đei klăih song băl đơ̆ng noh pơjing đei jơhngâm pran ăn bơngai jang vă adrin jang mưh kơdih kâu păng tơpôl kŭm jang đei ‘lơ̆ng ngăl.”

Ƀok Trương Hồ Anh Hoàng, Phŏ kơdră Anih vei lăng dôm tơring jang kơmăy dêh char Đắk Lắk ăn tơbăt, tơdrong pơjei băl “Bơ̆ jang hơgei, bơ̆ jang gơ̆h” tơklep hăm hŏk pơhrăm păng jang kiơ̆ jơhngâm đon Ƀok Hô tơiung đei jơhngâm pran, đon rơgei đơ̆ng công nhân bơngai jang tơ̆ dôm anih jang, anih tĕch mơdro: “Tơ hơnăp kơnh, Anih vei lăng dôm tơring jang kơmăy dêh char vă adrin jang hơdoi hăm anih jang roi tơbăt ăn bơngai jang, bơngai iŏk đe jang adrin bơ̆ jang, mă loi jĭ jang kiơ̆ tơdrong pơjei băl bơ̆ jang ăn rim bơngai.”

Mưh tơmam bơ̆ jang đei hơmet pơ ‘lơ̆ng, jên khei roi tŏk, dôm tơdrong tơgŭm đei vei lăng ‘lơ̆ng ‘nŏh gô tơgŭm ăn công nhân, bơngai jang tơ̆ Đắk Lắk sơđơ̆ng jơhngâm bơ̆ jang roi tơnăp hlŏh dơ̆ng.

Tơlĕch tơdrong pơjei băl ‘mêm kơ teh đak, Công đoàn jơ̆p tơring tơ̆ dêh char Đắk Lắk akom jơhngâm pơm hơdăh tơdrong pơjei băl sơnăm 2024 hơdai hăm tơdrong pơjei băl “Bơ̆ jang hơgei, jang gơh”, “Vang roi tơƀôh rơgei, pơvih pơvăn ‘lơ̆ng”; krao hơvơn đoàn viên, công nhân, bơngai jang pơjei băl jang ‘lơ̆ng tơdrong jang 01 triu tơdrong pơcheh rơgei, hơtŏk tơdrong tơchĕng hơlen, tơmât yoa khoa hŏk, kơmăy kơmŏk, hơtŏk tơdrong jang xa roi đei yoa ‘lơ̆ng. Kŭm hăm ‘nŏh, pơjei băl pơgơ̆r ‘lơ̆ng dôm tơdrong vei lăng năng tông truh tơdrong đei yoa ăn bơngai jang păng tơdrong đei yoa ăn đoàn viên, bơngai jang, tơrek truh tơdrong tơgŭm ăn đoàn viên, bơngai jang tơƀâp pơmat tat; kĭ pơkăp dôm tơdrong đei yoa ăn đoàn viên, dôm tơdrong jang hue lăng truh tơmam drăm, jơhngâm đon, pơvih pơvăn ăn tơdrong đei yoa tôch tơgăl đơ̆ng đoàn viên, bơngai jang.