Tơdrong jang đei jên tơlĕch jang đơ̆ng jên mong tơ̆ tơring, hăm kơsô̆ jên jang truh 338 ti, man 20 jăl trong păng 5 tŏ gơng, pơjing tơdrong hiôk hian vă jang atŏk tơiung mŭk drăm, tơpôl tơ̆ tơring. Kơdră vei lăng kon pơlei dêh char Đắk Nông Hồ Văn Mười pơma hơdăh, trong gre kơdâu hrĕnh âu jĭ tơdrong jang tih, tôch gĭt kăl ăn Đắk Nông, Bình Phước păng jơ̆p tơring Tây Nguyên - Đông Nam Bộ.

Trong gre kơdâu hrĕnh Gia Nghĩa - Chơn Thành đei đĭ đăng jên tơmât jang truh 25.540 ti, tơchĕng adrol gô jang đang lơ̆m sơnăm 2026, tơmât yoa lơ̆m sơnăm 2027. Trong âu ưh lăp kăt tơjur ƀiơ̆ jơnăr yak vih vât đĕch mă oei pơih đei tơdrong ‘lơ̆ng ‘nao vă jang tŏk, iŏk yoa ‘lơ̆ng rim tơdrong găh mŭk drăm, chă tơmang lăng păng sơng iŏk jên tơmât jang tơ̆ tơring.