Rim ‘măng tơbăt Năr tơblăh iŏk rơngei tơring pơbăh, pơjing đei 1 teh đak kơjăp ‘lơ̆ng, ƀok Y Nguôm Byă tơ̆ plei Đắk Tuôr, xăh Cư Pui, apŭng Krông Bông, dêh char Đắk Lắk ƀlŏk dơ̆ng dôm khei ‘năr pơm yu kĭch vang tơblăh Mi sơ̆. Ƀok tơroi, kơplăh dŏh sơ̆, khul yu kĭch pơlei hăm tơdrong chĕp kơ̆l đơ̆ng yŏng linh tơ̆ xăh ‘nŏh Y Ơn Niê lơ ‘măng iung tơblăh tang găn ưh ăn hơyăt rôp kon pơlei.

Ama Hoa pơđou dơ̆ng, mă đơ̆ng ƀôm ƀrâm đôh jring jrang dang yơ, kon pơlei tơ̆ plei Đắk Tuôr oei hơnơ̆ng choh jang xa, chă tơmam tơgŭm ăn kăch mang: “Vă pơvih ăn kơdrăn tơblăh, pơvih ăn ƀô đô̆i bơ̆n, bơngai ‘lơ̆p jang tơdrong iĕ, bơngai ‘lŏ jang tơdrong tih, ưh gơ̆h kŭp kơ̆l yơ̆r ti, bơ̆n athei dŏng teh đak bơ̆n. Tơring hơtăih yăih, băt ră tơtă kon pơlei kon kông ngăl mă lei ưh gơ̆h lê̆ hiong teh đak”.

Đơ̆ng rŏng năr tơblăh iŏk rơngei, pơjing đei 1 teh đak kơjăp ‘lơ̆ng, Đảng ƀô̆, khul kơdră pơgơ̆r, kon pơlei dôm hơdrĕch hơdrung xăh Cư Pui rôp ti bơ̆ jang hơmet pơ ‘lơ̆ng hiong răm đơ̆ng tơblăh sơ̆, vang pơjei băl choh jang xa, khŏm pơjing pơlei pơla roi đunh roi tŏk pơdrŏng. Đơ̆ng ưh kơmăh phe xa ƀa sŏng, ưh kơ đei hơbăn ao hrŭk, ưh gơ̆h jang xa, dang ei lơ unh hnam lơ̆m xăh đĭ tŏk pơdrŏng sŏng xa jơnap, 1 sơnăm jang xa đei truh kơhrĕng triu hlak jên.

Ƀok Y Sự Byă tơ̆ plei Khanh, xăh Cư Pui, chơt hơiă tơroi: “Tơdrong arih xa kơ kon pơlei hrei ‘nâu pơting hăm adrol sơ̆ hiôk jơnap ƀiơ̆ tơpă. Kon pơlei dang ei băt trong jang xa, jang tŏk kơtă tơ̆ pơlei kơdih. Đei 1 kơsô̆ unh hnam băt jang kiơ̆ khoa hŏk ki thuơ̆t, dang ei tơdrong arih xa kơ đe sư đei ƀôh ƀiơ̆ kơ adrol sơ̆ tơpă”

Xăh Cư Pui, apŭng Krông Bông, dêh char Đắk Lắk đei 13 pơlei pơla, hăm 2.700 unh hnam kon pơlei, hlŏh 14.000 ‘nu bơngai, kon pơlei kon kông đei vă jê̆ 90%. Truh dang ei, xăh hơtăih yăih âu đĭ đei unh điên tơ̆k hơdăh, hnam trưng, hnam pơgang, dơnâu đak, đak rơgŏh… tŏk bŏk đei yoa ‘lơ̆ng. Ƀok Y Kok M’Drang, Bí thư Đảng xăh Cư Pui, ăn tơbăt, kŭm hăm tơdrong tơtăm tơmât jên jang đơ̆ng teh đak, kon pơlei dôm hơdrĕch hơdrung tơ̆ xăh mât 1 jơhngâm vang pơjing tơring tơrang ‘nao. Xăh vă hơnơ̆ng tưk tơiung đon jang tơnăp đơ̆ng đe đảng viên krao hơvơn kon pơlei, tơplih ming đon tơchĕng, trong choh jang xa, hơdai hăm pơtho tơƀôh khoa hŏk ki thuơ̆t vă jang atŏk tơiung mŭk drăm: “Akŏm jơhngâm păng tơƀôh trong ăn đe đảng viên athei jang tơnăp, hơnơ̆ng năm hơdrol lơ̆m tơdrong jang atŏk tơiung mŭk drăm, tơpôl. Hăm trong jang “Đảng viên jang hơdrol kon pơlei ‘moi kiơ̆”. Kiơ̆ đơ̆ng trong jang thoi noh đĭ đăng kăn ƀô̆ đảng viên ‘ngoăih kơ bơ̆ jang tơiung pơjing đảng, pơjing anih jang chinh trĭ nhôn oei tơlĕch trong jang atŏk tơiung mŭk drăm hai, ‘nŏh jĭ tơdrong tơm vă atŏk tơiung mŭk drăm unh hnam, jang kiơ̆ kơmăy kơmŏk ‘nao”.

Chĕp vei, tưk tơiung tơdrong juăt jang kăch mang, đơ̆ng tơring hơtăih yăih, tơring kon kông tôch pơmat tat, xăh Cư Pui oei jang tŏk pran găh mŭk drăm tơpôl vă tơgăl hăm hơnăn tơring kơtang nuih mơng.