VOV4.Bahnar - Đei ƀôh đơ̆ng jơ hngơ̆m ‘mêm yom kơ ƀok Hồ, tơ̆ rim pơ lei pơ la kơ bơ ngai Xơ đăng tơ̆ dêh char Kon Tum, tơ drong hŏk pơ hrăm păng jang kiơ̆ ƀok Hồ đei kon pơ lei băt kơ dih pơ vei pơm kiơ̆. Kră pơ lei A Bơ, Bí thư Chi bộ plei Tua Tem, xăh Đăk Long, apŭng Đăk Hà, dêh char Kon Tum, mĭnh ‘nu bơ ngai ‘lơ̆ng lơ̆m hŏk pơ hrăm păng pơm kiơ̆ ƀok Hồ lơ̆m tơ ring kon kông dêh char Kon Tum.

            Dôm năr hơ tuch khei 8, tơ drong jĭ hơ buh COVID-19 tơ̆ rim dêh char găh pơ băh đei ƀôh krê hơ mơt, tơ̆ dêh char Kon Tum hlôi đei dôm jĭt ‘nu brŏk đơ̆ng tơ ring jĭ đei tơ poh jĭ SARS-CoV-2. Tơ̆ hơ năp hơ mơt kơ jĭ hơ buh gô tơ poh lanh lơ̆m tơ pôl, Kră pơ lei A Bơ, Bí thư Chi bộ plei Tua Tem, xăh Đăk Long, apŭng Đăk Hà hơ nơ̆ng năm truh tơ̆ rim hnam tơ roi tơ băt, pơ tho kon pơ lei jang kiơ̆ pơm rơ goh anih arih sa, yua đak ôp ti, gom muh măt mư̆h lĕch tơ̆ trong păng tơ roi tơ băt mă tơ păt mư̆h đei kon oh dăh mă kơ tum kơ tŏng brŏk đơ̆ng tơ ring jĭ. Mĭnh nơ̆r ƀok A Bơ pơ ma, kon pơ lei plei Tua Tem tă kơ chih răk păng băt kơ dih pơm kiơ̆. Ƀơ̆t đei apĭnh ‘ tơ drong hơ iă “ găh tơ drong jang tơ roi tơ băt, krao hơ vơn iŏk đei yua ‘lơ̆ng, Kră pơ lei A Bơ hơ hiĕk chhôk, ư̆h kơ đei tơ drong hơ iă kiơ ôh, ĭnh bơ ngơ̆t, lăng truh ăn tơ pôl ‘noh kon pơ lei hlôh jơ hngơ̆m đon ĭnh:

            “Ĭnh ling lang kiơ̆ hơ dai lơ̆m kon pơ lei năm truh tơ̆ ŭnh hnam vă tơ roi tơ băt ăn kon pơ lei mă loi ‘noh jĭ tơ drong tơ chĕng, trong jang vă hơ tŏk tơ iung mŭk drăm roi ‘năr roi tih pran. Găh tơ drong 1 jơ hngơ̆m đon lơ̆m tơ ring kon pơ lei oei, găh hŏk pơ hrăm kon sâu ư̆h kơ gơh kơ ƀăh. Pơ jing trong oei sa ‘lơ̆ng hơ iă lơ̆m pơ lei pơm liơ vă kon pơ lei gơh jang, vei rong kon tơ rong, choh pơ tăm hơ tŏk tơ iung mŭk drăm đang kơ ‘noh hŏk pơ hrăm roi ‘năr roi hơ gei.”

Ƀok A Bơ (păh ‘ngieo) tơ ƀơ̆p pơ lung bơ ngai kră tơ̆ plei Pa Cheng, xăh Đăk Long

            Sơ năm ‘nâu mă đơ̆ng đĭ 70 sơ năm bơ̆ih ră, mă lei Kră pơ lei, Bí thư Chi bộ A Bơ oei rim năr đei măt mư̆h tơ̆ pơ lei kơ pal, ƀlă kơ ‘noh kueng hơ la. Kŭm hăm jơ hngơ̆m đon jang tơ năp ‘noh tơ drong hlôh vao đơ̆ng 1 ‘nu bơ ngai hlôi đei pơm thây pơ tho, đang kơ ‘noh jang tơ drong jang vei lăng hnam trưng hŏk kŭm tơ gŭm ƀok tôch kơ lơ. Đei trong jang sư phạm akŏm hăm tơ drong gơh tơ roi ‘lơ̆ng, trong jang đơ̆ng  Đảng, teh đak, đơ̆ng khŭl kơ dră rim tơ ring kiơ̆ đơ̆ng ƀok A Bơ truh hăm kon pơ lei tôch kơ hrĕnh, ƀônh kơ hlôh păng tơ jê̆. Mă hơ dăh ‘noh nhen tơ drong jang kiơ̆ trong jang hơ tŏk tơ iung Đảng lơ̆m kon pơ lei đei lui, Chi bộ plei Tua Tem mă ƀok pơm Bí thư đei 11 đảng viên ‘noh 10 đảng viên ‘noh bơ ngai đei lui. Lơ̆m jang kiơ̆ tơ chơ̆t kơ sô̆ 05 đơ̆ng Anih tơm Chĭnh trĭ “ Găh tŭn pran hŏk pơ hrăm păng pơm kiơ̆ đon tơ chĕng, jơ hngơ̆m đon ‘lơ̆ng Hồ Chí Minh”, Chi bộ plei Tua Tem ling lang chông hơ drol lơ̆m kơ sô̆ 9 Chi bộ găh Đảng bộ xăh. Bí thư Đảng xăh Đăk Long Trần Ngọc Trực, tơ băt:

            “Đảng bộ lăng Chi bộ âu tơ drong tơ lĕch jang kiơ̆ tơ chơ̆t 05 tôch kơ ‘lơ̆ng. Găh tơ drong jang hơ lĕch jang truh rim đảng viên. Đei dôm tơ drong jang, lơ trong jang tôch kơ đei yua. Đảng viên, kon pơ lei jang kiơ̆ tôch kơ ‘lơ̆ng. Pơ tôch 5 sơ năm jang kiơ̆ tơ chơ̆t 05, Chi bộ păng kơ dih ƀok A Bơ đei Đảng bộ xăh tơ ƀôh, rơ̆ih hăm Khŭl chĕp kơ̆l pơ gơ̆r anih jang Đảng apŭng hơ len lăng hơ păh Hla ar pôk pơ ư ăn khŭl grŭp păng kơ dih đơ̆ng Chi bộ ‘nâu jang kiơ̆ tôch kơ hơ gei tơ chơ̆t 05”.

            Hơ tŏk hơ năp jang đơ̆ng kơ dih, Kră pơ lei, Bí thư Chi bộ plei Tua Tem A Bơ hlôi đei lơ tơ gop ăn tơ drong hơ tŏk tơ iung atŭm kơ pơ lei păng kơ xăh Đăk Long. Đunh kơ âu 7 sơ năm ƀơ̆t xăh Đăk Long đei pơ jing kơ sô̆ ŭnh hnam pơ ngot dơ nuh hin đei hloh 73%. Dang ei kơ sô̆ âu tơ jur oei pă 37,2%. Lơ̆m hơ tŏk tơ iung mŭk drăm tơ plih ‘lơ̆ng tơ drong arih sa, ƀok A Bơ pơm jŭk yŭk trong hơ lâu hai, vang tơ gŭm tơ drong hlôh vao, pơ tho kon pơ lei ki thuơ̆t pơ tăm, vei lăng cheh phe, kơ su, tang găn jĭ ăn kơ pô rơ mo, hơ tŏk tơ iung hơ ke lai hai... Ƀok A Sự, Kơ dră Anih jang Mặt trận tổ quốc Việt Nam xăh Đăk Long tơ băt, plei Tua Tem đei 125 ŭnh hnam kon pơ lei bơ ngai Xơ đăng, ƀok A Bơ ‘noh jĭ bơ ngai yak hơ drol lơ̆m hơ tŏk jơ hngơ̆m đon tơ goăt tơ goăl, akŏm kon pơ lei, jing bơ ngai ‘lơ̆ng kơ ŭnh hnam păng kon pơ lei:

            “Kră pơ lei A Bơ tôch kơ tơ năp păng Kră pơ lei arih tôch kơ ‘lơ̆ng pơm jŭk yŭk trong hơ lâu ăn kon hơ ‘lơ̆p lơ̆m hnam păng jô̆ hloi lơ̆m pơ lei pơ la. Mưh rim ‘măng hôp pơ lei Kră pơ lei A Bơ pơ ma hăm kon pơ lei, kon pơ lei tôch kơ mơ̆ng.”

Ƀok A Bơ (mă 2 đơ̆ng păh ‘ngieo) pơ tho kon pơ lei ki thuơ̆t vei lăng cheh phe

            Kŭm hăm tơ drong arih sa kon pơ lei roi ‘năr roi tơ plih ‘lơ̆ng, dôm sơ năm tơ jê̆ âu tơ̆ xăh Đăk Long, apŭng Đăk Hà, dêh char Kon Tum, gơ nang đơ̆ng dôm bơ ngai năm hơ drol nhen ƀok A Bơ, lơ kơ jă kăp gĭt joh ayŏ joăt joe ‘lơ̆ng hơ iă kơ bơ ngai Xơ đăng đei vei răk, tơ ƀăk mong. Xăh Đăk Long đei 5 pơ lei ‘noh đĭ đăng rim pơ lei tă kơ pơm Rông ƀlep kiơ̆ kră sơ̆ kơ bơ ngai Xơ đăng pơm hơ nih hŏk hôp kon pơ lei. Rim khŭl chĭng chêng, hơ soang đei pơ vei păng pơ tho dơ̆ng ăn jơ hnơr mơ lôh. 1,2 tơ drong jang kră sơ̆, nhen tanh sĭt bơ̆n kơ đum kơ dŏng, tanh brai vai khăn ... tŏk bŏk pơ̆ih ăn tơ drong hiôk ăn bơ ngai Xơ đăng tơ̆ âu hơ tŏk tơ iung mŭk drăm ŭnh hnam.

Khoa Điềm: Chih

Thuem: Tơ blơ̆